MMÝ Qazaqstan fılıalynda qazaq tilin oqytýdy jetildirý isi jolǵa qoıyldy
ASTANA. KAZINFORM – Fılıal Qazaqstan ekonomıkasy úshin kadrlar daıyndaıdy. Mamandardy daıarlaý elimizdiń áleýmettik-ekonomıkalyq damýynyń qajettilikterin eskere otyryp iske asyrylady. Osymen baılanysty MMÝ Qazaqstan fılıalynda qazaq tilin, Qazaqstan tarıhy men mádenıetin oqytýǵa erekshe kóńil bólinedi.
Jańa jyldaǵy Ǵylymı keńestiń alǵashqy otyrysynda Fılıalda qazaq tilin oqytýdy jetildirý máselesi talqylandy. Jańa ustanymdardyń biri retinde QAZTEST júıesine negizdelgen ádistemeni engizý qarastyryldy.
«2001 jyldan beri Fılıalda 2300-den astam joǵary bilikti mamandar daıyndalyp shyǵaryldy. Sondyqtan biz ulttyq komponent pánderiniń – Qazaqstan tarıhy men qazaq tilin oqyp-úırený men oqytý ádistemesin jetildirýge erekshe kóńil bólemiz. Qazaq tilin bilý deńgeıin arttyrý maqsatynda Fılıalda ony jetildirý baǵdarlamasy ázirlendi», - dep atap ótti fılıal dırektory Aleksandr Sıdorovıch.
Qazaq tilin oqytýdy jetildirýdiń jańa ustanymdarynyń biri retinde QAZTEST júıesi negizinde memlekettik tildi meńgerý deńgeıin obektıvti baǵalap, bolashaq túlekterge odan ári memlekettik qyzmetke túsip, Qazaqstandaǵy joǵary oqý oryndarynda magıstratýra men doktorantýrada bilim alýyna jaǵdaı jasaıtyn ádistemeni engizý máselesi jolǵa qoıyldy. Júıeniń talaptaryna sáıkes, qazaq tili boıynsha bilimine aǵymdaǵy baqylaýdy rettilikpen jasap otyrý arqyly QAZTEST júıesi engiziletin bolady.
Baqylaý kesindileri tyńdalym, leksıkalyq jáne grammatıkalyq qurylym, oqylym, jazylym bloktary boıynsha júrgiziletin bolady. Búgingi kúni barlyq oqý baǵyttarynyń 1 jáne 2 kýrs stýdentteri úshin baqylaý kesindilerin oryndatý júıesin engizýdiń alǵashqy nátıjeleri bar. Stýdentterdiń basym bóligi memlekettik tildi meńgerýdiń negizgi jáne orta deńgeılerin kórsetti.
Ǵylymı keńeste oqý protsesiniń praktıkalyq baǵyttylyǵyn kúsheıtý maqsatynda aralyq baqylaýdyń emtıhanymen birdeı bolatyn qajetti deńgeıdiń QAZTEST sertıfıkaty bolýyn esepke alý tájirıbesin engizý qajet degen sheshim qabyldandy. Sonymen birge fılıaldyń kitaphana qoryn qazaq tilindegi kórkem jáne oqý ádebıetterimen tolyqtyrý, «Іskerlik qazaq tili» jáne «Akademııalyq jazý» baǵdarlamalary boıynsha fakýltatıv sabaqtaryn uıymdastyryp ótkizý, sondaı-aq oqytý protsesinde paıdalaný úshin ınnovatsııalyq elektrondyq oqýlyqtardy ázirleý jáne daıyndaý jóninde sheshim qabyldandy.
Qazaq tiliniń oqý-ádistemelik bazasyn qalyptastyrý jáne jetildirý úshin jáne stýdentterdiń qazaq tilin oqyp-úırený motıvatsııasyn arttyrý úshin respýblıkalyq, oblystyq, qalalyq qazaq tilin oqytý jáne qazaq tili oqytýshylaryn qaıta daıarlaý ortalyqtarymen, máselen, QR QAZTEST Ulttyq testileý ortalyǵymen, «Til-Qazyna» ulttyq ǵylymı-praktıkalyq ortalyǵymen, Y.Altynsarın atyndaǵy Ulttyq bilim akademııasymen yntymaqtastyqty keńeıtý josparlanyp otyr.
