MMÝ-dyń alǵashqy sheteldik fılıaly bizdiń astanamyzda ashyldy – Qyrymbek Kósherbaev
«Bıyl elimiz úshin erekshe jyl. Óıtkeni ultymyz úshin uly, halqymyz úshin qadirli, memleketimiz úshin eń mártebeli qundylyq – Táýelsizdiktiń 30 jyldyǵy! Sizderdi ulysymyzdyń uly merekesimen shyn júrekten quttyqtaımyn! Táýelsizdikti alý bar da, ony tuǵyrly etý bar. Osynaý 30 jyl ishinde Qazaqstan ǵasyrǵa parapar joldan ótti. Tuńǵysh Prezıdent – Elbasy Nursultan Nazarbaevtyń kóshbasshylyǵymen elimiz áleýmettik-ekonomıkalyq turǵydan turaqty damý jolyna tústi, qoǵamdyq-saıası ahýal qalyptasty. Shekaramyz shegendelip, jańa elordamyz boı kóterdi. Halqymyzdyń sany artty, yrys-berekesi molaıdy. Elbasy bastaǵan joldy Memleket Basshysy Qasym-Jomart Kemeluly Toqaev laıyqty jalǵastyryp, halqymyz órkenıettiń órine kóz tigip otyr», - dedi Memlekettik hatshy MMÝ Qazaqstan fılıalynda ótken mereıtoı keshinde.
Óz sózinde Memlekettik hatshy egemendiktiń bir tuǵyry – dostyq ekenin, ótken tarıhta qazaqtyń talaı asyl arystary Reseıde bilim alyp, jetilgenin atap ótti.
«Arǵy zamanda da, keshegi keńestik kezeńde de, búgingi táýelsizdik ýaqytynda da bizdiń bilim izdep, ilim qýǵan jastarymyzdyń kóbi Reseıdi tańdady. Sebebi ondaǵy bilim berý isiniń tamyry tereń. Sonyń biri, tipti biregeıi – M. Lomonosov atyndaǵy Máskeý memlekettik ýnıversıteti. Atalǵan oqý ornyn bitirgen talaı túlek búginde azat Qazaqstannyń áleýmettik-ekonomıkalyq ahýalyn kóterýge belsendi atsalysyp júr.
MMÝ-dyń alǵashqy sheteldik fılıalynyń bizdiń astanamyzda ashylýy Qazaqstan men Reseı arasyndaǵy dostyq, baýyrlastyq baılanystardyń jarqyn aıǵaǵy boldy. Osy oqıǵanyń arqasynda kóp jyldyq dástúri bar Qazaqstan men Reseıdiń ǵylymı-bilim berý baılanystary jańa serpinge ıe boldy», - dedi Memlekettik hatshy.
Aıta keteıik, M. V. Lomonosov atyndaǵy MMÝ Qazaqstan fılıaly QR Tuńǵysh Prezıdenti - Elbasy Nursultan Nazarbaevtyń bastamasymen jáne RF Prezıdenti Vladımır Pýtınniń qoldaýymen qurylǵan.
2000 jylǵy 9 qazanda Reseı Federatsııasynyń Prezıdenti V.V. Pýtınniń Qazaqstan Respýblıkasyna jasaǵan memlekettik saparynda MMÝ rektory, akademık V.A. Sadovnıchıı men QR Bilim jáne ǵylym mınıstri Q.E.Kósherbaev Astana qalasynda L.N.Gýmılev atyndaǵy Eýrazııalyq ulttyq ýnıversıtettiń bazasynda M.V. Lomonosov atyndaǵy Máskeý memlekettik ýnıversıtetiniń Qazaqstan fılıalyn qurý týraly hattamaǵa qol qoıǵan bolatyn.
Buǵan deıin Memleket basshysy Qasym-Jomart Toqaev M. V. Lomonosov atyndaǵy Máskeý memlekettik ýnıversıtetiniń Qazaqstan fılıalyn 20 jyldyǵymen quttyqtap, fılıalǵa jańa ǵımarat beriletinin aıtqan edi.
