MMÝ-diń qazaqstandyq fılıalyna bólek ǵımarat berilýi múmkin
NUR-SULTAN. QazAqparat - Máskeý memlekettik ýnıversıtetiniń qazaqstandyq fılıaly úshin bólek ǵımarat berý josparlanyp otyr. Bul týraly Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda belgili boldy, dep habarlaıdy QazAqparat tilshisi.
Senator Murat Baqtııaruly Máskeý memlekettik ýnıversıteti qazaqstandyq fılıalynyń bir stýdentine jylyna qansha qarjy bólinetinin surady.
Óz kezeginde QR Bilim jáne ǵylym vıtse-mınıstri Rústem Bıǵarı árbir bakalavrıat stýdentke 1 mln 690 myń teńge, al magıstrant úshin 1 mln 790 myń teńge bólinetinin jetkizdi.
«M.V. Lomonosov atyndaǵy MMÝ-diń Máskeýdegi bas ýnıversıtetinde oqytý 2 mln 600 teńgege jetedi. Al qazaqstandyq fılıalda oqytý quny 40 paıyzǵa arzan. Búginde Qazaqstandaǵy 1 mln 690 myń teńge kommýnaldyq tólemdi de qamtıdy», - dedi vıtse-mınıstr.
QR Bilim jáne ǵylym mınıstrliginiń málimetinshe, kelisim boıynsha qazaqstandyq fılıal úshin bólek ǵımaratpen qamtamasyz etý qarastyrylǵan. Sebebi MMÝ-diń fılıaly búginde osy ýaqytqa deıin L.N. Gýmılev atyndaǵy Eýrazııa ulttyq ýnıversıtetiniń bazasynda jumys jasaýda.
«Jańa kelisimge sáıkes, Máskeý memlekettik ýnıversıtetiniń fılıaly úshin bólek ǵımaratty usyný eskerilgen. Bul ǵımarat MMÝ fılıaly menshigine berilmeıdi, ıaǵnı Qazaqstan ıeleginde qalady. Kelisimniń merzimi aıaqtalsa, onda ǵımarat elimizdegi mekemelerdiń paıdalanýyna beriledi», - vıtse-mınıstr.
Budan buryn habarlanǵandaı, búgin Senatta «QR Úkimeti men RF Úkimeti arasyndaǵy M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly kelisimdi ratıfıkatsııalaý týraly» zań jobasy qaraldy. Áleýmettik-mádenı damý jáne ǵylym komıtetiniń keńeıtilgen otyrysynda atalǵan zań jobasyn Senattyń jalpy otyrysynyń talqylaýyna shyǵarý týraly sheshim qabyldandy.
Aıta keteıik, Qazaqstandyq fılaldyń qyzmetin odan ary zańnamalyq turǵyda bekitý maqsatynda 2017 jylǵy 9 qarashada Chelıabınsk qalasynda QR Úkimet men RF Úkimeti arasynda M.V. Lomonosov atyndaǵy Máskeý memlekettik ýnıversıtetiniń qazaqstandyq fılıalynyń jumys isteýi týraly kelisimge qol qoıyldy.Osy kelisim fılıaldyń jumys isteýin retteıdi.
