MMA: Vıkıngterdiń Kóshpelilerge kóshbasshy taǵyn bosatyp berer ýaqyt jetti
ASTANA. QazAqparat - Qazaqstan 12-19 qarasha kúnderi Bahreıinde ótetin MMA-dan álem chempıonatyna resmı shaqyrý aldy. Bul jaıynda MMA Federation of Kazakhstan baspasóz qyzmetinen málim etti, dep habarlaıdy QazAqparat.
Shaqyrý aralas jekpe-jekten álemdegi eń iri promoýshn sanalatyn UFC seriktesi MMA Halyqaralyq federatsııasynan (IMMAF) kelip otyr.
Aǵymdaǵy jyly Qazaqstan sportshylary Sıngapýrde ótken Azııanyń Birinshi chempıonatynda tabysty óner kórsetip, 3 altyn, 2 kúmis jáne 3 qola medal enshilegen bolatyn. IMMAF prezıdenti Kerrith Brown qazaqstandyq komandanyń Sıngapýrdaǵy ónerine joǵary baǵa berip, álem chempıonatynda da osyndaı myqty komandany kórýge nıetti ekendigin bildirdi.
Osyǵan oraı aldaǵy ýaqyttaǵy josparlarymen bólisken MMA qaýymdastyǵynyń tóraǵasy Asylbek Dúısenov: «Biz bul shaqyrýdy qabyl alamyz. Bizdi MMA boıynsha Qazaqstannyń ulttyq quramasyn daıyndaý boıynsha aýyr jumys kútip tur. Ol keminde eki oqý-jattyǵý jıynyn qamtıdy. Qazirgi ýaqytta sportshylardyń daıyndalýyna barlyq jaǵdaı jasalǵan múmkinshilikterin eskere otyryp, oqý-jattyǵý jıynyn ótkizetin birneshe sporttyq nysandy qarastyrýdamyz. Taıaý ýaqytta ulttyq quramanyń jattyǵý protsesi jaıynda keńinen aıtyp beretin bolamyz. Biz búkil álemge kóshpelilerdiń ýaqyty kelip, vıkıngterge kóshbasshy taǵyn bosatýǵa týra kelgendigin kórsetý úshin bar kúsh-jigerimizdi salamyz», - dedi.
Qazaqstan MMA qaýymdastyǵy oqý-jattyǵý jıynynyń birneshe kezeńin ótkizýdi josparlap otyr. Onyń qorytyndysynda Bahreınniń Manama qalasynda ótetin MMA boıynsha álem birinshiliginde el namysyn qorǵaıtyn ulttyq qurama sapy jasaqtalatyn bolady.
Esterińizge sala ketsek, MMA halyqaralyq federatsııasynda Shvetsııa quramasy kóshbasshy sanalady. Degenmen, Sıngapýrda ótken Azııa chempıonatynda skandınavııalyq quramaǵa komandalyq esepte ese jibergenimen, jeke jekpe-jekterde basymdyq tanytqan Qazaqstan quramasy laıyqty básekeles bola alǵan edi.
