MMA: Qytaılyq jankúıerler qazaq jigitiniń ádiletsiz jeńilisine narazy boldy
BEIJІŃ. QazAqparat - 2019 jylǵy 23 maýsymǵa qaraǵan túnde aralas jekpe-jekten Qytaıdyń birneshe dúrkin chempıony Jumabek Tursyn Qazaqstan azamattyǵyn alǵan soń alǵash ret Beıjińdegi «Kunlun Fight» arenasyna shyqty, dep habarlaıdy «QazAqparat» HAA-nyń Qytaıdaǵy menshikti tilshisi.
Qazaqstandyq sportshy búkil jekpe-jek barysynda ıAo Hýngannan basym túskeni kórinip-aq turdy. Biraq soǵan qaramastan úshinshi raýndta Jumabektiń aıaǵy taıyp ketkenin tóreshilerdiń biri nokdaýnǵa baǵalady. Sóıtip, jalpy 29:28, 29:28, 28-30 esebinde Jumabekke jeńilis jazyldy.
«Men aıqas nátıjelerimen kelispeımin, ádiletsizdik boldy. Ony arenada da aıtyp edim», - deıdi Jumabek Tursyn «QazAqparat» HAA tilshisine bergen suhbatynda.
Arenaǵa kelgender, MMA sportshylary úshinshi tóreshiniń álgi sheshimine ań-tań bolysty. Tóreshilerdiń ádiletsizdigi tipti Qytaıdaǵy ınternet qoldanýshylarynyń arasynda da narazylyq týdyrdy.
«Jaýyngerlik ónerleri álemi» (Gedou Shijie) mobıldik qosymshasynda «Jumabek arenanyń ózinde-aq tóreshilerdiń ádildigin kúmán astyna qoıdy» atty maqala jarııalandy. Onda úsh raýnd boıy ıAo Hýngan qorǵanǵany, qazaqstandyqtyń basym bolǵany aıtylǵan.
Eske sala keteıik, 10 jyl buryn Jumabek ıAo Hýngandy eki ret jeńip, Qytaıdyń chempıony bolǵan.
Avtor: Sadyq Aqıjanov
