MMA-dan Álem chempıonaty: Qazaqstandyq synǵan aıaǵymen júldeger atandy
ASTANA. QazAqparat - Qazaqstandyq MMA sheberi Álem chempıonatynda synǵan aıaǵymen úsh aıqas ótkizip, saıystan qur qaıtpaı qola medal ıelendi, dep habarlaıdy QazAqparat.
«Ózderińiz biletindeı, MMA-dan Qazaqstan quramasy Bahreınde MMA-dan ótken álem chempıonatynda jeńis tuǵyrynan kórindi. Jalpy, komandamyz 9 medal, onyń ishinde 1 altyn, 1 kúmis jáne 7 qola medalge ıe boldy. Qola medal ıelengenderdiń ishinde 56,7 keli salmaqta óner kórsetken oraldyq Álibı Temirtasovty erekshe atap ótkim keledi. Ekinshi aıqastyń ortasynda ol aıaǵynan jaraqat alyp, qalǵan eki aıqasty aqsap júrip ótkizdi. Shynymdy aıtsam, men onyń sanyn loý-kıkter jaıy aýyrtqanyn, isiný kóp ótpeı ketetin shyǵar dep oılaǵan edim. Búgin Otanymyzǵa oralǵannan keıin rentgenge túskesin Álibıdiń jilinshik súıegin syndyry alǵanyn bildik!!! Mundaı jaraqatpen álem chempıonatynda medal ıelenbek túgili, tipti júrýdiń ózi beınet edi. Men tańǵalyp otyrmyn», - dep jazady Aıdar Mahmetov óziniń Feısbýk paraqshasynda.
Onyń aıtýynsha, Álibı ¼ fınalda burynǵy chempıonattyń júldegeri - amerıkalyqty qylqyndyryp, jeńip ketken.
«Al jartylaı fınalda Álibı osy saıysta chempıon bolǵan daǵystandyq Rýslan Satıevke alapat qarsylyq kórsetti. Tóreshiler Satıevtiń qolyn kóterdi. Mine, qazaq jeri osyndaı batyrlarymen maqtanýy kerek! Osyndaı jigitter bizdiń elimizdiń ataq-abyroıyn aspandatady», - deıdi A.Mahmetov.
Onyń aıtýynsha, Álibıdiń dıagnozy kúrdeli bolǵandyqtan, jaraqat otasyz jazylmaıdy.
