MMA-dan Álem chempıonaty fınalynda taǵy bir qazaqstandyq jeńilip qaldy
ASTANA. QazAqparat - Astanada ótip jatqan MMA-dan Álem chempıonatynyń fınalynda Temirlan Ixsanǵalıev (77,1 keli) reseılik Shamıl Mýsaevpen kúsh synasyp kórdi, dep xabarlaıdy QazAqparat tilshisi.
Bul jekpe-jekte alǵashqy parter Temirlannyń enshisinde boldy. Alaıda onyń qarsylasy jyldam sytylyp shyqty da, biraz ýaqyt basymdyqqa ıe boldy. Temirlan qarsylasynyń qolyn qansha orasa da, búıirden birneshe qatty soqqyny ótkizip aldy. Al ekinshi raýndta reseılik sportshy tyıym salynǵan soqqyny jasady. Degenmen, Temirlan aıqasty jalǵastyrdy. Parterge qaıta túskende birneshe aýyr soqqyny ótkizip aldy. Jekpe-jektiń sońyna qaraı ábden sharshap qaldy. Osylaısha, jas reseılik sportshynyń mereıi ústem boldy.
Aıta keteıik, fınaldyń alǵashqy jekpe-jeginde qazaqstandyq Sanjar Ádilov (56,7 keli) tóreshiler sheshimimen jeńimpaz atanyp, chempıondyq belbeýdi ıelendi. Al Denıs Mýtsnık (65,8 keli) reseılik Abdýlmýtalıp Gaırbegovqa ese jiberip, kúmis júldeger atandy. Alda Qazaqstannyń taǵy eki sportshysy óner kórsetedi. Erkinbek Іnjeldiń (84 keli) qarsylasy da reseılik sportshy - Magomed Shaxrýdınov. Al Marııa Agapova (61,2 keli) belarýs Lılııa Kazakpen tóbelesedi.
