MMA boıynsha Qazaqstan chempıonatynyń jeńimpazdary anyqtaldy
ASTANA. QazAqparat - 1-2 mamyr kúnderi Atyraý qalasynda erler men áıelder arasyndaǵy MMA boıynsha Qazaqstan chempıonaty ótti. Oq boıy ozyq shyqqan sportshylar Azııa men Álem chempıonattarynda óner kórsetetin bolady, dep habarlady QazAqparat tilshisi
Bıylǵy chempıonatqa 13 oblystan 116 sportshy qatysty. Jankúıerler eki kún boıy jekpe-jek sheberleriniń ónerin tamashalady. Halyqtyń kóp jınalǵany sonsha, «Atyraý» sport kesheninde ıne shanshar jer bolmady. Chempıonatqa álemniń 25 chempıonyn daıyndap shyǵarǵan tanymal reseılik bapker, UFC-diń jarqyn juldyzy Habıb Nýrmagomedovtiń ákesi - Abdýlmanap Nýrmagomedov te keldi. 
«Qazaqstan chempıonatynyń joǵary deńgeıde ótip jatqany qýantady. MMA-da óner kórsetip júrgen qazaqstandyq jekpe-jek sheberleriniń daıyndyǵy da jyl saıyn ósip keledi. Men ózim Saǵyndyq Mekeevti jaqsy tanımyn. Onyń jigitteri burynnan beri Daǵystanǵa kelip, jattyǵyp turady. Osy joly maǵan 57 keli salmaq dárejesinde óner kórsetken Sanjar Ádilovtiń daıyndyǵy qatty unady. Men Daǵystanda ótken oqý-jattyǵýlarda baıqap qalǵanmyn. Menińshe, ol tyńǵylyqty daıyndyǵyn jalǵastyra berse, kásibı sportshy retinde biraz jetistikterge jetedi», - deıdi Abdýlmanap Nýrmagomedov.
Budan bólek, «Alash-Praıd» klýbynyń prezıdenti Danııar Qasqaraýov pen QR Djıý-djıtsý qaýymdastyǵynyń vıtse-prezıdenti Áshim Qalı chempıonattyń qurmetti qonaǵy boldy.
Bıylǵy chempıonattyń jeńimpazdary: áıelder arasyndaǵy básekelerde 52 keli salmaqta Zarına Qadyrbaeva (Qostanaı oblysy) top jarsa, 61 kelide Marııa Agapova (Pavlodar oblysy) jeńimpaz atandy.
Al erler arasyndaǵy jarystarda
56,7 kelide - Sanjar Ádilov (Qaraǵandy oblysy)
61 keli - Abylaı Tólesh (Atyraý oblysy)
65,8 keli - Denıs Mýtsnek (Almaty oblysy)
70,3 keli - Eraly Adyrov (Manǵystaý oblysy)
77,1 keli - Aıbek Bólekbaev (Atyraý oblysy)
84 keli- Mansur Shahgıreev (Akmola oblysy)
93 keli - Raıhan Madı Raıhan (Shyǵys Qazaqstan oblysy), sondaı-aq +93 keli salmaqta Aleksandr Astapov (Kostanaı oblysy) jeńis tuǵyrynan kórindi.
Bıylǵy chempıonattyń barlyq jeńimpazdary 19-21 mamyr kúnderi Qyrǵyzstannyń Osh qalasynda ótetin Azııa chempıonatyna qatysady.
