MMA boıynsha Qazaqstan birinshiliginde kásipqoı klýb chempıondary men ulttyq qurama músheleri judyryqtasady
ASTANA. QazAqparat - MMA boıynsha Qazaqstannyń «Battle of Nomads-7» WMMAA PRO ASIA DIVISION týrnırinde sheteldik sportshylar bolmaıdy. Bul týraly búgin Ortalyq kommýnıkatsııalar qyzmetinde ótken baspasóz máslıhatynda Qazaqstannyń MMA federatsııasynyń prezıdenti Anatolıı Kım málim etti.
Aıta keteıik, Qazaqstan chempıonaty osymen tórtinshi márte uıymdastyrylýda. Onyń basty ereksheligi, týrnır barysynda áýesqoı kezdesýlermen qatar, kásipqoı jekpe-jekter de ótetin bolady.
«Bizdiń «Kóshpendiler aıqasy» tek qazaqstandyq sportshylardyń qatysýymen ótedi. Bul týrnırdiń qatysýshylar tizimi tolyqtaı jergilikti sportshylardan quralǵan. Ártúrli klýbtardan shaqyryldy, bul klýbaralyq format, bizde mundaı buryn eshqashan bolǵan emes», - dep atap ótti ol.
Onyń sózine qaraǵanda, osy sport túrin damytyp kele jatqan kásipqoı klýbtar Qazaqstanda jeterlik. Olar túrli jarystar uıymdastyryp, óz chempıondaryn alǵa jyljytady.
«Sol klýbtardyń barlyq chempıondary men Qazaqstan quramasy múshelerin osyndaı bir alańda jolyqtyratyn birinshilik ótkizilip jatqany halyqtyń qyzyǵýshylyǵyn týdyrady», - dedi A.Kım.
Birinshiliktiń eń basty kezdesý Álem jáne Azııa chempıony, «Kóshpendiler aıqasynyń» birneshe dúrkin jeńimpazy Shavkat Rahmonov pen Alash Pride klýbynyń úzdik sportshylarynyń biri Ádil Boranbaev arasynda ótpek.
