MMA álem chempıonatynda Qazaqstan komandalyq esepte alǵash ret 1-oryn aldy
ASTANA. QazAqparat - Qazaqstan MMA boıynsha jastar arasyndaǵy álem chempıonatynda tuńǵysh ret komandalyq birinshi oryndy ıelendi, dep habarlaıdy QazAqparat ulttyq quramaǵa silteme jasap.
11-18 aqpanda Serbııa astanasy Belgradta 18-20 jas aralyǵyndaǵy jastar men 21 jastan asqan eresekter arasynda MMA boıynsha álem chempıonaty ótip jatyr.
Álem chempıonatyna 60 elden 628 sportshy qatysty. Qazaqstan atynan MMA ulttyq quramasynyń 33 múshesi óner kórsetip jatyr.
16 aqpanda 18-20 jastaǵy jastar arasyndaǵy fınaldyq jekpe-jekter ótti.
Jarqyn teketires nátıjesinde Qazaqstan quramasynyń qorjynynda 3 altyn, 2 kúmis jáne 5 qola medal bar.
Astanalyq sportshy Ersultan Shákenbaı ótken jylǵy chempıon ataǵyn rastap, endi jastar arasynda MMA boıynsha eki dúrkin álem chempıony atandy.
Ersultan 56,7 kelige deıingi salmaqta óner kórsetedi. Ol fınalda tájikstandyq Loık Ikromovty qylqyndyrý ádisimen jeńdi.
Aıta keteıik, Ersultan barlyq jekpe-jekterin merziminen buryn aıaqtady.
Aqmola oblysynyń týmasy Matılda Bachýrına (52,2 kelige deıin) óz mansabyndaǵy álem chempıonatynyń alǵashqy «altynyn» jeńip aldy.
Ol birinshi jekpe-jegin qylqyndyrý ádisimen, al ekinshisin tehnıkalyq nokaýtpen aıaqtady.
Nemis sportshysy Songıýl Karatorakpen fınaldyq kezdesýde tóreshiler biraýyz sheshimimen Matılda jeńdi.
Matılda MMA-men aınalysqanyna bir jyldan ǵana asty, biraq qazirdiń ózinde keremet nátıjeler kórsetýde.
65,8 kelige deıingi salmaqta Idrıs Idrısov ulttyq qurama qorjynyna úshinshi altyndy saldy.
Ol fınalda bolgarııalyq Svetoslav Ivanovty tóreshilerdiń biraýyz sheshimimen utty. Idrıs úshin bul MMA boıynsha birinshi halyqaralyq jarys boldy.
Kúmis medaldi Batys Qazaqstan oblysynyń eki sportshysy jeńip aldy. 47,6 kelige deıingi salmaqta Gúlnaz Ábdirahmanova fınalda amerıkalyq Ebıgeıl Alvarespen kezdesti. Jekpe-jek aıaqtalýǵa jaqyn edi, biraq úshinshi raýndtyń sońynda qazaqstandyq qylqyndyrý ádisine túsip, jeńiliske ushyrady. 56,7 kelige deıingi salmaqta ótken jylǵy álem chempıony Karına Sısenova fınalda ýkraınalyq sportshy Anastasııa Holınkodan tóreshilerdiń sheshimimen jeńilip, vıtse-chempıon atandy .
Komandalyq esepte Qazaqstan quramasy alǵash ret MMA boıynsha jastar arasyndaǵy álem chempıonatynda birinshi oryn aldy.
Erteń, 18 aqpanda MMA boıynsha eresekter arasyndaǵy álem chempıonatynyń fınaldyq jekpe-jekteri ótedi.
