MQU qyzmeti toqtatylǵan jaǵdaıda qaryzdy óteý mindetti me

ASTANA. KAZINFORM — Qarjy naryǵyn retteý jáne damytý agenttigi mıkroqarjy uıymynyń qyzmeti toqtatylǵan jaǵdaıda mıkrokredıtter boıynsha mindettemelerdi oryndaý tártibin túsindirdi.

Vedomstvo málim etkendeı, mıkroqarjy uıymynyń qyzmetin toqtatý, onyń ishinde lıtsenzııa qaıtaryp alynǵan jaǵdaıda qaryz alýshylardyń mindettemelerin joıýdy bildirmeıdi. Mıkrokredıtterdi qaıtarý boıynsha mindettemeler tolyq kólemde saqtalady.

— Talap etý quqyqtary basqaǵa berilgen jaǵdaıda burynǵy MQU nemese jańa kredıtor aldyndaǵy qaryz alýshynyń bereshegi óz kúshinde qalady. Qaryzdy basqa kredıtorǵa bergen jaǵdaıda qaryz alýshyǵa bereshekti óteýdiń jańa derektemeleri men tártibi týraly habarlanýy tıis, — dep eskertti agenttik.

Qarjy naryǵyn retteý jáne damytý agenttigi azamattar mıkrokredıtterdi resimdeýge jaýapkershilikpen qaraýy qajet ekenin aıtady.

— Mıkrokredıtpen birge qaryz alýshylar ony paıyzben qaıtarýǵa mindetteme alatynyn este ustaǵan jón. Mıkrokredıt alý úshin MQU-ǵa habarlaspas buryn, kompanııanyń zańdy túrde jumys isteıtinine kóz jetkizý de mańyzdy. MQU-da qoldanystaǵy lıtsenzııanyń bar-joǵyn Agenttiktiń saıtynda tekserýge bolady. Qaryz alýshylardyń mindetteri ǵana emes, tıisti quqyqtary da bar. Eger MQU-men daýlar týyndasa, siz mıkroqarjy ombýdsmanyna tegin keńes alý jáne quqyqtardy qorǵaý úshin júgine alasyz, — dep túsindirdi vedomstvo.

Aıta keteıik, 2024 jyly Qazaqstan Respýblıkasynda 29 mıkroqarjy uıymy (MQU) qyzmetin toqtatty, onyń 17-i — erikti negizde, 12-i — ýákiletti organnyń sheshimi boıynsha. Negizgi sebepter — zańnamany, onyń ishinde prýdentsııalyq normatıvterdiń talaptaryn júıeli túrde buzý.

Osydan buryn Qazaqstan halqy mıkroqarjy uıymdaryna 2,9 trln teńge nesıe qaryz ekeni anyqtaldy.