MKK bankrottyq rásiminde azamattarǵa qandaı shyǵyndar júktelgenin túsindirdi

Bul týraly QR Qarjy mınıstrligi Memlekettik kirister komıteti Dármensiz boryshkerlermen jumys basqarmasynyń basshysy Merýert Sısembaeva málim etti.

Onyń aıtýynsha, tólem qabileti tómen azamatqa shyǵynnyń bir bóligin júkteý zań tujyrymdamasyna qaıshy kelmeıdi.

— Protsess barysynda azamat belgili bir shyǵyndarǵa ushyraýy múmkin. Bul halyqaralyq tájirıbege sáıkes keledi: kóptegen elde bankrottyq rásimderi aqyly bolady, óıtkeni olar qarjy salasyndaǵy basqarýshynyń qyzmetterine aqy tóleýdi talap etedi. Alaıda Qazaqstan mundaı shyǵyndardyń shamadan tys bolmaýy úshin tıisti normalar engizildi, - dedi M. Sısembaeva onlaın brıfıngi barysynda.

Ol zańnamada boryshker men qarjyny basqarýshynyń arasyndaǵy múddelerdiń teńgerimin belgileıtin tetikter qamtylǵanyn atap ótti.

— Bir jaǵynan qıyn jaǵdaıǵa tap bolǵan adam tursa, ekinshi jaǵynan jumysy úshin aqy alýǵa quqyǵy bar qarjy salasynyń mamany turady. Bul rette zańda bul shyǵyndardy memleket kóteretin jaǵdaılar da qarastyrylǵan, - dedi ol.

Onyń sózine qaraǵanda, elde sottan tys bankrottyq rásimin tańdaıtyndardyń úlesi basym. Bankrottyqtyń osy túri tegin jáne barlyq isterdiń 90%-dan astamyn qamtıdy.

— Bul - aqysyz kórsetiletin memlekettik qyzmet. Al sot protsesine toqtalsaq, onda qarjy basqarýshysynyń qyzmetine aqy tóleýdi talap etedi, biraq onyń merzimi shekteýli,- dep túsindirdi spıker.

Merýert Sısembaeva qarjy basqarýshysynyń fýnktsııalaryna jeke toqtaldy.

— Olar boryshkerdiń qarjylyq jaǵdaıyn taldap, múlkin túgendep, bar bolsa saýdaǵa shyǵarýdy uıymdastyrady, qorytyndy esepti daıyndaıdy, sot otyrystaryna qatysady. Onsyz bankrottyq rásimi múmkin bolmaıdy, - dedi ol.

Aıta keteıik, buǵan deıin Qazaqstanda kim bankrottyqqa ótinish bere alatynyn jáne qandaı talaptary bar ekenin jazǵan edik.