MKB jınaqtalǵan derekterdi taldaý arqyly bankterge proaktıvti sıgnaldar usynady
ASTANA. KAZINFORM — Memlekettik kredıttik bıýro (MKB) AntiFraud Forum Kazakhstan aıasynda jınaqtalǵan derekterdi paıdalana otyryp, bankterge proaktıvti sıgnaldar berý joldaryn túsindirdi. Bul týraly MKB-nyń Data Science basqarmasynyń basshysy Ádilet Erkin málim etti.
Moderator bıýronyń derekterin bankterge qalaı proaktıvti sıgnaldarǵa aınaldyratynyn surady.
— Biz saqtandyrý jáne kredıttik jobalar aıasynda tehnıkalyq operator retinde jumys isteımiz. Bank klıent kredıt alýǵa ótinim bergen kezde bıýroǵa júginedi, al biz qarjylyq qyzmet alýǵa nıetti sýbekt týraly ózekti ári senimdi aqparat usynamyz, — dedi Ádilet Erkin.
Spıkerdiń aıtýynsha, bıýro 1100-den astam kredıttik uıymnyń derekterin jınaqtap, sýbektiniń qarjylyq belsendiligin tek bir uıym sheńberinde emes, búkil naryq boıynsha taldaı alady.
— Eger qysqa ýaqyt ishinde bir sýbektke qatysty ártúrli uıymdardan kóp kredıttik ótinimder tússe, biz bankterge aldyn ala habarlaımyz. Osylaısha bank kredıt bermes buryn táýekeldi baǵalaı alady, — dedi ol.
Sonymen qatar bıýro bankterge skorıngtik esepteýler usynady, bul alǵashqy úsh tólem boıynsha merzimin ótkizip alý jáne defolt táýekelderin baǵalaýǵa múmkindik beredi.
Saqtandyrý salasynda bıýro polısti rásimdeýdiń, saqtandyrý jaǵdaılaryn retteýdiń jáne tólemderdi júzege asyrýdyń barlyq kezeńderine qatysady. Ár kezeńde memlekettik organdardyń derekteri negizinde qajetti servıster usynylady.
— Qarjy uıymdarynyń suranysyna sáıkes kastomdyq sheshimder ázirlep jatyrmyz, — dep túıindedi spıker.
Aıta keteıik, Qazaqstanda ınternet-alaıaqtyqtan kelgen shyǵyn 4,8 mlrd teńgege jetti.
