MQІA tóraǵasy Koreıa Respýblıkasynyń Personaldy basqarý mınıstri Kım Syn Homen kezdesti
ASTANA. KAZINFORM – Memlekettik qyzmet isteri agenttiginiń tóraǵasy Darhan Jazyqbaı Koreıa Respýblıkasynyń Personaldy basqarý mınıstri Kım Syn Homen kezdesti.
Basqosýda taraptar memlekettik qyzmettegi personaldy basqarý boıynsha qol qoıylǵan ózara túsinistik jáne yntymaqtastyq týraly Memorandýmdaǵy sharalardy iske asyrý barysyn talqylady.
«Darhan Jazyqbaı Memleket basshysynyń memlekettik qyzmetti túbegeıli jańǵyrtý boıynsha alǵa qoıǵan mindetterine sáıkes agenttikpen atqarylyp jatqan sharalar jáne osy baǵytta tsıfrlyq tehnologııalardy qoldaný jumysymen tanystyrdy. Agenttik tóraǵasy memlekettik qyzmette adam resýrstaryn jetildirý, HR quraldardy engizý, «e-Qyzmet» júıesi negizinde irikteý jáne personaldy basqarýdy tsıfrlandyrý boıynsha jobalar men bastamalarǵa da toqtaldy», - dep atap ótti agenttikten.
Kım Syn Ho memlekettik qyzmet salasyn zaman talabyna saı únemi jetildirip otyrý mańyzdylyǵyna toqtalyp, óz eliniń memlekettik qyzmet salasyndaǵy tájirıbesimen bólisti.
Sondaı-aq taraptar memlekettik qyzmetshilerdiń adam resýrstaryn basqarý salasyndaǵy biliktiligin arttyrý maqsatynda olar úshin qysqa merzimdi taǵylymdamalar men uzaq merzimdi oqytýdy uıymdastyrý múmkindigin talqylady.
MQІA tóraǵasy Koreıa Respýblıkasynyń memlekettik qyzmettegi adamı resýrstardy basqarýdaǵy jasandy ıntellekt tehnologııalaryn qoldaný jáne avtomattandyrý, sondaı-aq memlekettik kórsetiletin qyzmetterdiń sapasyn baǵalaý tájirıbesine qyzyǵýshylyq bildirdi.
Kezdesý sońynda taraptar alda memlekettik qyzmet salasyndaǵy tájirıbe jáne bilim almasýda yntymaqtastyqty odan ári damytýǵa daıyn ekendikterin bildirdi.
