MQІA tóraǵasy Darhan Jazyqbaı Baký qalasynda ótken halyqaralyq semınarǵa qatysty
ASTANA. KAZINFORM – Memlekettik qyzmet isteri agenttiginiń tóraǵasy Darhan Jazyqbaı Baký qalasynda Ázerbaıjan Respýblıkasynyń Memlekettik emtıhan ortalyǵymen uıymdastyrylǵan «Memlekettik qyzmettegi quzyrettilikke negizdelgen irikteý jáne tıimdilikti baǵalaý» taqyrybyndaǵy halyqaralyq semınarǵa qatysty.
Memlekettik qyzmet salasyndaǵy HR-dyń strategııalyq zamanaýı tájirıbeleri týraly pikirtalas jáne aqparat almasýǵa arnalǵan semınarda Ázerbaıjan, Grýzııa, Qyrǵyz Respýblıkaksy, Tájikstan, Túrkııa jáne Ózbekstan, Bosnııa jáne Gertsegovına, Soltústik Makedonııa elderiniń memlekettik qyzmet salasyndaǵy ýákiletti organdar men Astana memlekettik qyzmet habynyń basshylary, sondaı-aq sheteldik salalyq sarapshylar bas qosty.
Darhan Jazyqbaı sheteldik áriptesterine Qazaqstanda memlekettik qyzmetti transformatsııalaý baǵytynda «adamǵa baǵdarlanǵan», servıstik sıpattaǵy memlekettik apparatty qalyptastyrý sharalary jaıly baıandady.
«Memleket basshysy Qasym-Jomart Kemelulynyń Ádiletti Qazaqstan qurý jónindegi reformasy – elimizdiń árbir azamaty úshin teń múmkindikterdi qamtamasyz etýdegi basty baǵdar. Osyǵan oraı, biz mansaptyq jáne pozıtsııalyq modelderdiń elementterin qoldana otyryp, memlekettik qyzmettiń gıbrıdti modelin qalyptastyrýdamyz», - dedi MQІA tóraǵasy.
Ol jańa gıbrıdtik model aıasynda memlekettik qyzmetke «kirý» jáne odan «shyǵý» talaptarynyń jeńildetilýi, HR quraldaryn keńinen qoldaný jáne adamı resýrstardy strategııalyq basqarý júıesin damytý, kásibı mamandar men daryndy jastardy tartý, «e-Qyzmet» júıesinde iske qosylǵan onlaın irikteý formaty men personaldy basqarýdy tsıfrlandyrý boıynsha Agenttikpen júzege asyrylyp jatqan jobalar men bastamalarǵa toqtaldy.
Sondaı-aq Qazaqstandaǵy memlekettik qyzmetshilerdi baǵalaýdyń jańa avtomattandyrylǵan júıesine nazar aýdaryldy. Búginde memlekettik qyzmettegi basshylar úshin baǵalaý KPI-ge qol jetkizý nátıjeleri negizinde, qatardaǵy qyzmetshiler úshin – mindetterdi oryndaý sapasyna, merzimderdi saqtaýǵa, derbestik pen bastamashylyqqa, eńbek tártibine negizdelgen saralaý ádisi boıynsha júzege asyrylady.
Semınarǵa qatysýshy elder memlekettik qyzmettegi irikteý jáne quzyretterdi baǵalaý boıynsha ozyq tájirıbelerdi talqylap, memlekettik apparattyń tıimdiligin arttyrýda zamanaýı HR quraldaryn qoldanýdyń mańyzdylyǵyn aıtty.
Sonymen qatar qatysýshylar memlekettik qyzmetti damytý boıynsha Qazaqstannyń tájirıbesine erekshe qyzyǵýshylyq tanytqanyn aıta ketý kerek. Máselen, Bosnııa jáne Gertsegovına memleketiniń ókilderi «e-Qyzmet» júıesi boıynsha tájirıbe almasýǵa múddeli ekenin jetkizdi. Al, Ázerbaıjan respýblıkasynyń tsıfrlyq damý jáne kólik mınıstrligi Qazaqstandaǵy Assesment ortalyqtyń tájirıbesin óz baǵalaý júıesin ázirleýde eskergenin aıtty.
Іs-shara aıasynda MQІA tóraǵasy Darhan Jazyqbaı Ázerbaıjandaǵy memlekettik qyzmetke kadrlardy irikteýdi júzege asyratyn Memlekettik emtıhan ortalyǵy jáne jańa tsıfrlyq tehnologııalardy paıdalana otyryp, memlekettik qyzmetshiler men azamattar arasyndaǵy ózara is-qımyldy qamtamasyz etýge baǵyttalǵan ASAN memlekettik qyzmet kórsetý ortalyǵynyń jumysymen tanysty.
