Mızam bazary tóńiregindegi daý: Baıbek óziniń de, ákimdiktiń de múddesi joq ekenin aıtty
ASTANA. QazAqparat - Búgin Ortalyq kommýnıkatsııalar qyzmetindegi brıfıngte Almaty ákimi Baýyrjan Baıbek Mızam bazary tóńiregindegi daýǵa qatysty pikir bildirdi, dep habarlaıdy QazAqparat tilshisi.
«Mızam bazarynda sanıtarlyq normalar buzylǵan. Buǵan qosa, ol jerde qıyn-qystaý 90-shy jyldary konteınerler ruqsat qaǵazdarynsyz ornalastyrylǵan. Al konteıner degenimiz júk tasymaldaýǵa arnalǵan metall ydys qoı. Bazar ıeleri bolsa, sol jerde satýshylar densaýlyǵyn qurtyp, ystyqta da, sýyqta da jumys istegenin, adamdardyń barǵanyn qalaıdy», - dedi Baýyrjan Baıbek.
Osy rette ol ótken aptada ǵana bazardan órt shyqqandyǵyn eske saldy.
«Ózderińiz de biletindeı, qurylysty baqylaý basqarmasy bazardyń zańsyz bóligin ǵana súrip tastap, jerdi memleketke qaıtarýdy talap etken bolatyn. Qalanyń qoǵamdyq keńesi atalǵan jerge aýdan balalaryna arnalǵan mektep salýdy usyndy. Buǵan qosa ol jerde úlken qajettilik bar, jer jetpeıdi. ıAǵnı, biz 8 mektep salmaqpyz, al onyń 5-eýine jer joq. Satyp alý úshin barlyq protsedýralardan ótip, sottasýǵa týra keledi. Adamdardyń barlyq ýaqytta da baǵaǵa kóńilderi kónshimeıdi. Eger bazar zańdy talaptardy oryndamaıtyn bolsa, onda jerdi memleketke alyp, sol jerde mektep salamyz. Taǵy da aıtam, meniń de, ákimdiktiń de jeke múddesi joq. Qanshama qıyn bolsa da biz bul jumysty qala men memleket múddesi úshin, kóleńkeli ekonomıkany tómendetip, qarapaıym almatylyqtardy áleýmettik qorǵaý úshin jalǵastyra beremiz», - dedi Baýyrjan Baıbek.
Osyǵan deıin almatylyqtardyń «Mızam» bazaryndaǵy konteınerlerdiń ornyna mektep salýdy talap etkendigi týraly jazdyq.
Sonymen qatar Almaty ákimdiginiń «Mızam» bazarymen jalǵa alý týraly kelisimshartty buzatyndyǵy týraly habarladyq.
