Mııaly aýylyndaǵy eki mektep oqýshylary sabaqty jazda jalǵastyrady

ATYRAÝ. KAZINFORM – Atyraý oblysyndaǵy Mııaly aýylynda ornalasqan eki mekteptiń oqýshylary sabaqty jazǵy kanıkýl kezinde oqıtyn boldy. 

Atyraý oblystyq bilim basqarmasynyń baspasóz qyzmetinen málim etkendeı, Qyzylqoǵa aýdanynyń eki mektebindegi sabaq jazǵy kanıkýl kezinde ótedi.

«Keshe, 31 naýryzda Qyzylqoǵa aýdanynda sý tasqynyna baılanysty tótenshe jaǵdaı jarııalanyp, Mııaly aýylyndaǵy turǵyndardy ishnara evakýatsııalaý bastaldy. Osyǵan baılanysty aýdan ortalyǵyndaǵy Y.Shórekov mektep-gımnazııasy men H.Dosmuhamedov atyndaǵy orta mektep ǵımaraty evakýatsııalyq pýnkt retinde belgilendi. Bilim ordasynyń birinde 480, al ekinshisinde 948 oqýshy bar. Tótenshe jaǵdaı kezinde toqtatylǵan sabaqty jazǵy kanıkýl kezinde jalǵastyrady», -dep habarlady basqarmanyń baspasóz qyzmeti.

Al, erteń, 2 sáýirde Mııaly orta mektebiniń 326 oqýshysy sabaqty onlaın formatta oqıdy. Taısoıǵan aýylyndaǵy Ǵ.Slanov atyndaǵy orta mekteptiń 210 oqýshysy da sabaqty osyndaı formatta bastaıdy.

Eske sala ketelik, budan buryn Atyraý oblysyndaǵy bir aýdanda tótenshe jaǵdaı jarııalanǵanyn habarlaǵan edik.

Keıin Oıyl ózenindegi sý tasqynyna baılanysty Mııaly aýylynan 559 turǵyn evakýatsııalandy.

Sondaı-aq, Mııaly aýylyna tirelgen sýdyń deńgeıi 1 metr 20 sm qurady.

Oıyl ózeniniń mańynan 7 sharýa qojalyǵy qaýipsiz aýmaqqa kóshirildi.

Al, búgin Mııaly aýylyn tasqyn sýdan qorǵaý jalǵasyp jatqanyn jazǵan bolatynbyz.