Mııake Kýnıhıko: Japonııalyqtar Uly Jibek jolyna qyzyǵýshylyqpen qaraıdy
Japonııa Mınıstrler kabınetiniń arnaıy keńesshisi, «Canon Institute for Global Studies» ınstıtýtynyń dırektory Mııake Kýnıhıko Qazaqstannyń geosaıasaty týraly, bul turǵyda Japonııa Qazaqstanǵa qalaı qaraıtyny týraly dáris oqyp, BAQ ókilderiniń suraqtaryna jaýap berdi.
«Geosaıasat degen – qandaıda bir memlekettiń geografııa turǵysynan qaraǵanda qaýipsizdigin zertteıtin ǵylym. Memleketterdiń strategııasy óte qarapaıym qaǵılalarǵa negizdelýi kerek. Birinshi, shekaralas memlekettermen durys qarym-qatynasta bolý. Ekinshi, araqashyqty saqtaý. Úshinshi, teńiz arqyly baılanys túrlerin saqtap qalý. Osy jaǵynan alyp qaraǵanda Qazaqstan Japonııa úshin óte mańyzdy ról atqarady. Qazaqstan qazba baılyqtaryna baı, beıbitshiligi men turaqtylyǵy bar, gúldenip kele jatqan memleket», - deıdi Mııake Kýnıhıko.
Onyń aıtýynsha, Qazaqstan Sovet odaǵy ydyraǵannan keıin aımaqtaǵy turaqtylyqty saqtap qala aldy.
«Qurlyqtaǵy memleketterdiń strategııasy ártúrli. Bizdiń memleketterdiń geografııalyq ornalasýy ártúrli bolǵanmen, ortaq maqsaty bar, ol - memleketti damytyp, baı ári erkin el bolý. Halyqaralyq qatynastan habary bar árbir adam Ortalyq Azııanyń, Qazaqstannyń mańyzdylyǵyn sózsiz túsinedi. Sol sebepti Sovet odaǵy ydyraǵanan keıin kóptegen memleket nazaryn Ortalyq Azııaǵa aýdardy. Ekonomıkalyq turǵyda ózge memlekettiń nazaryn ózińe aýdartý úshin aldymen tarıhı, mádenı jáne salt-dástúr qundylyqtaryn saqtap qalý kerek. Japonııalyqtar Uly Jibek jolyna qyzyǵýshylyqpen qaraıdy. Olardy osyǵan nazar aýdarta otyryp qarym-qatynas qurýǵa bolady, biraq bul elshiler qolǵa alatyn másele», - deıdi ol.
Zoom platformasynda ótken sharaǵa Elbasy qorynyń janyndaǵy Álemdik ekonomıka jáne saıasat ınstıtýty jáne Fılosofııa ınstıtýtynyń sarapshylary, QR Syrtqy ister mınıstrligi, QR-daǵy Japonııa elshiliginiń ókilderi, elimizdegi JOO-nyń stýdentteri men BAQ ókilderi qatysty.