Mitsubishi Pajero jeti jyldan keıin naryqqa qaıta oraldy
ASTANA. KAZINFORM – Aty ańyzǵa aınalǵan Pajero jol talǵamaıtyn kóligi álemdik naryqqa qaıta oralady. Mitsubishi Motors jeti jyldyq úzilisten keıin Japonııada modeldiń jańa býynyn tanystyrdy, dep habarlaıdy Kyodo agenttigi.
Jańa Pajero alǵash Taıland naryǵyna shyǵady. Japonııa men Aýstralııada satylymy 2027 jyldyń naýryzyna deıin bastalady. Keler jyldan bastap Mitsubishi jol talǵamaıtyn kólikti Ońtústik-Shyǵys Azııa, Latyn Amerıkasy jáne Taıaý Shyǵys elderin qosa alǵanda, shamamen 100 naryqqa shyǵarýdy josparlap otyr.
Pajero – Mitsubishi-diń eń tanymal modelderiniń biri. Alǵashqy býyny 1982 jyly tanystyrylǵannan beri kompanııa álem boıynsha 3,29 mln-nan astam Pajero shyǵardy. Jol talǵamaıtyn kólik uzaq saparlarǵa arnalǵan senimdi avtomobıl retinde tanyldy. Al debıýtinen bir jyl ótken soń iri rallı jarysynda óz sanaty boıynsha jeńiske jetti.
– Biz Mitsubishi Motors-tyń eń úzdik tehnologııalaryn biriktirip, barlyq resýrstarymyzdy jumyldyrdyq, – dedi kompanııa prezıdenti Keısýke Kıshıýra baspasóz máslıhatynda.
Onyń aıtýynsha, jańa model barlyq jaǵynan eleýli ózgeriske ushyraǵan.
Mitsubishi Pajero-nyń oralýy kompanııanyń ishki naryqtaǵy satylymyn arttyrýǵa kómektesedi dep úmittenedi. Avtokontsern 2030 qarjy jylyna qaraı Japonııadaǵy satylymdy 2024 qarjy jylymen salystyrǵanda 50%-ǵa, shamamen 180 myń avtomobılge deıin arttyrýdy kózdep otyr.
Aldaǵy ýaqytta Mitsubishi kontserni Pajero-nyń kólemi kishireıtilgen eki nusqasyn da shyǵarýdy josparlap otyr.
Model jol talǵamaıtyn kólikterge suranys joǵary bolyp turǵan kezeńde naryqqa qaıta oralyp otyr. MarkLines zertteý kompanııasynyń málimetinshe, 2025 jyly Japonııadaǵy iri jol talǵamaıtyn kólikter naryǵynyń kólemi shamamen 100 myń avtomobıl bolǵan.
Bul segmentte Toyota shyǵaratyn Land Cruiser kósh bastap tur. Onyń úlesine naryqtyń shamamen 40%-y tıesili.
Eske sala ketsek, Mitsubishi Motors bıyl mamyr aıynda aty ańyzǵa aınalǵan Pajero jol talǵamaıtyn kóligin qaıta shyǵaratynyn málimdegen edi.
Sondaı-aq Mitsubishi Qazaqstannan sırek kezdesetin gallıı metalyn ımporttaı bastaıtynyn habarlaǵan.
