Mıtropolıt Mefodıı Bas múftı Ábsattar qajy Derbisálige jáne el musylmandaryna Qurban aıt meıramymen baılanysty quttyqtaý joldady
A. Qarashanyń 26-sy. QazAqparat. Astana jáne Almaty Mıtropolıti Mefodıı Ortalyq Azııa Múftıler keńesiniń tóraǵasy, Qazaqstan musylmandary Dinı basqarmasynyń tóraǵasy, Bas múftı sheıh Ábsattar qajy Derbisálige alda kele jatqan qasıetti meıram - Qurban aıtqa oraı quttyqtaý joldady.
«Sizdi jáne Qazaqstan Respýblıkasynyń barlyq musylman qaýymyn ıslamnyń uly meıramdarynyń biri - Qurban aıt meıramymen shyn júrekten quttyqtaımyn!», delingen quttyqtaýda.
Mıtropolıt Mefodıı óziniń joldaýynda ıslam men pravoslav dininiń dástúrleri bizdiń halqymyz úshin mańyzdy jáne búgingi qazaqstandyq qoǵamǵa qajetti ekendigin atap ótken.
«Biz ózimizdiń dindarlarymyzdy tynyshtyq pen kelisimge, rýhanı negizderimizdi saqtaýǵa, qaıyrymdylyq pen áleýmettik qyzmettegi ózara áreketke, jalpy azamattyq jobalarda birlesken is-qımyldarǵa turaqty shaqyryp otyramyz. Ǵalamı qaýip-qaterlerdiń aldynda biz ózimizdiń din jolyndaǵy qyzmetimizde, álemdi dinı turǵydan tanýda, qaıyrymdylyqtyń túpkilikti saltanat quratyndyǵyna batyl senimde qashan da birgemiz.
Asa qurmetti Múftı Haziret, Sizge jáne eldiń barlyq musylman qaýymyna myqty densaýlyq, Otanymyzdyń ıgiligi úshin jumysta tabys jáne Qudaıdyń qýat berýin tileımin!», dep atap ótilgen quttyqtaýdyń mátininde.
