Mıtropolıt Aleksandr: Qazaqstannyń dástúrli qundylyqtarǵa oralýy Nursultan Nazarbaevtyń esimimen baılanysty
«Siz búkil álemge danyshpan saıasatker jáne ómirin Otanǵa qyzmet etýge arnaǵan kórnekti memleket qaıratkeri retinde tanymalsyz. Sizdiń ómirlik mol tájirıbeńiz, danalyǵyńyz ben saıası kóregendigińiz respýblıkanyń qalyptasýy jolyndaǵy kúrdeli jaǵdaılarda qundylyqqa aınaldy. Osy jyldar ómirdiń barlyq salalaryndaǵy aýqymdy reformalar júrgizýmen, ekonomıka ósimi úshin jaǵdaı jasaýmen, qoǵamdy kezeń-kezeńimen demokratııalaýmen erekshelendi. 1991 jyly Siz bastap bergen el damýynyń qarqyny kúsheıip, óziniń aıtarlyqtaı nátıjesin berip otyr», - delingen quttyqtaý hatta.
Mıtropolıt Qazaqstannyń dástúrli rýhanı-adamgershilik qundylyqtar men mádenı túptamyryna qaıta oralýy Nursultan Nazarbaevtyń esimimen tyǵyz baılanysty ekendigin atap ótedi. Kóptegen jyldyq memlekettik jumystaǵy mańyzdy jetistikteriniń biri respýblıkany ultaralyq beıbitshilik pen konfessııaaralyq kelisimniń ortasyna aınaldyrýy ekendigine basa nazar aýdartady. Sonyń arqasynda elimiz álemdik jáne dástúrli dinder ókilderimen yntymaqtastyq úshin biregeı dıalog alańy qurylǵandyǵyn aıtady.
Sóziniń sońynda Astana jáne Qazaqstan mıtropolıti Aleksandr Qazaqstandaǵy Pravoslav shirkeýi elimizdegi konfessııaaralyq beıbitshilik pen ultaralyq kelisimdi nyǵaıtý isine belsene aralasa beretindigin atap ótti.
