Mıtıngiler men buqaralyq sharalar indetti jappaı juqtyrýǵa jaǵdaı týǵyzady - Jandarbek Bekshın
ALMATY. QazAqparat – Qalanyń bas memlekettik sanıtarlyq dárigeri Jandarbek Bekshın almatylyqtardy mıtıngiler men jappaı jıyndarǵa qatyspaýǵa shaqyrady, dep habarlaıdy QazAqparat tilshisi.
«Qalada koronavırýs indeti boıynsha tirkelgen oqıǵalar áli jalǵasýda, tek ótken táýlik ishinde belgisi bar 49 adamnan ınfektsııa anyqtaldy, al bir apta ishinde – 334 adam tirkeldi. Osylaısha, Almatyda barlyǵy 2790 adamnan koronavırýs tirkeldi, 10 adam qaıtys boldy»,– deıdi Jandarbek Bekshın.
Onyń aıtýynsha, indetti juqtyrýshylar statıstıkasy pandemııa aýqymynyń áli de azaımaǵanyn kórsetedi.
«Osyny eskere otyryp, qalanyń bas sanıtarlyq dárigeri ári sanıtarlyq-epıdemıologııalyq jaǵdaıdyń nasharlaýyna jol bermeıtin jaýapty adam retinde, sońǵy kezderi áleýmettik jelilerde tarap jatqan adamdar kóp jınalatyn buqaralyq sharalar men mıtıngke shaqyrýdyń tózgisiz ekendigine nazar aýdaramyn. Qalada epıdemııa áli de jalǵasyp jatqan kezde adamdardyń ómiri men densaýlyǵyna qaýip tóndirý baryp turǵan jaýapsyzdyq»,– deıdi ol.
Álemdik tájirıbe kórsetip otyrǵandaı, kóp jınalý, jaqyn aralasý azamattardyń indetti jappaı juqtyrýyna ákep soǵady.
«Óıtkeni, mıtıngter juqtyrý oshaǵy bolyp tabylady. Eger, mundaı buqaralyq sharalar indetti juqtyrýǵa sebepshi bolsa, onda mıtıngterdi uıymdastyrýshylar zańnamaǵa sáıkes jaýapqa tartylady, tipti qylmystyq is qozǵalady. Osyndaı buqaralyq sharalarǵa qatysýshylar indet juqtyratyn bolsa, onda epıdemıologııalyq tekserý aıasynda shettetiledi»,– dedi ol.
COVID-19 juqtyrǵandar ınfektsııalyq aýrýhanaǵa jatqyzylady.
«Olarmen aralasqandar, meıli olar indetti kepshilik jerde nemese úıde juqtyrsyn, provızorlyq jáne karantındik gospıtalda oqshaýlanady. Sanıtarlyq-epıdemıologııalyq hattamanyń talaptary osyndaı, biz ony mindetti túrde oryndaımyz. Hattamaǵa sáıkes, sanıtarlyq-epıdemıologııalyq qyzmetkerler karantın rejıminde jappaı jıyndarǵa qatysqan azamattardy tirkep, vıdeotúsirilim júrgizedi. Al, tirkeý qatysýshylar sanyn eseptep, juqtyrý oshaǵynyń epıdemıologııalyq tekserýin odan ary júrgizip, koronavırýstyń taralýynyń aldyn alý úshin qajet»,– dedi bas sanıtar dáriger.
Sonymen qatar, ol buqaralyq sharalarǵa, mıtıngterge qatysýshylar koronavırýs juqtyrýdyń epıdemııalyq tizbegin quraıtynyn atap ótti. Osynyń saldarynan indet Sizdiń úıińizge, otbasyńyzǵa taraıdy, eń aldymen balalarǵa jáne qart adamdarǵa qaýip tóndiredi.
«Mine, sondyqtan men buryndary Almaty qalasynyń aýmaǵynda túrli buqaralaryq sharalardy ótkizýge tyıym salý jóninde qaýly qabyldaǵan edim. Qart adamdar men burynnan qalyptasqan syrqaty bar jandardan adamdar kóp jınalatyn jerlerden aýlaq júrýdi suraımyn. Óıtkeni, Siz indetti tez juqtyratyndar sanatyna jatasyz. Budan ózge, jappaı juqtyrý qaýpiniń bolýy múmkin ekendigin eskere otyryp, tıisti qyzmetterden adamdar kóp jınalatyn oryndarǵa dezınfektsııa júrgizýdi kúsheıtýdi talap etemin», – dedi ol.
Onyń aıtýynsha, talaptar men ótinishter qalanyń ár turǵynynyń densaýlyǵyn qorǵaý men sanıtarlyq-epıdemıologııalyq jaǵdaılardy jaqsartýǵa negizdelgen.
«Sondyqtan barlyq almatylyqtardan jaýapkershilik tanytýdy ótinemin. Óıtkeni, qoǵamnyń densaýlyǵy árqaısymyzdyń jeke qaýipsizdik sharalaryn múltiksiz oryndaýymyzdan quralady»,– dep qortyndylady J. Bekshın.
