Mıtıng týraly zań «halyq únine qulaq asatyn memleket» tujyrymdamasy kórinisteriniń biri - sarapshy
«Májilis depýtattary «Qazaqstan Respýblıkasynda beıbit jınalystar uıymdastyrý men ótkizý tártibi týraly» zań jobasyna Parlament Senaty engizgen ózgerister men tolyqtyrýlardy qoldady jáne «Qazaqstan Respýblıkasynda beıbit jınalystar uıymdastyrý men ótkizý tártibi týraly» jańa zań qabyldandy. Memleket basshysy jınalystardy, mıtıngiler men demonstratsııalardy ótkizý rásimin jańa zańnamalyq resimdeýdi qajet etetinine ótken jyldyń maýsym aıynyń ortasynda nazar aýdardy. Zań jobasyn ázirleý barysynda qoǵamdyq uıymdar men qaıratkerlerdi talqylaý protsesine tartý úshin jaǵdaılar jasaldy. Sarapshylar, azamattyq qoǵam men Qoǵamdyq keńesterdiń ókilderi óz pikirlerin bildirdi. Jańa zańdy ázirleý protsesinde Ulttyq qoǵamdyq senim keńesi erekshe ról atqardy. Nátıjesinde mıtıngiler men beıbit jınalystardyń basqa da nysandaryn uıymdastyrý protsesin retteıtin erejeler ǵana emes, sondaı-aq qoǵamdyq ómirdiń osy túrin qabyldaýdyń ózi de ózgerdi», - dedi ol.
Onyń atap ótýinshe, beıbit jınalystar - mıtıngter, demonstratsııalar, manıfestatsııalar azamattyq qoǵam men bılik dıalogynyń bir túri. Osylaısha, osy saladaǵy zańnamany yryqtandyrý «halyq únine qulaq asatyn memleket» tujyrymdamasy kórinisteriniń biri bolyp tabylady.
«QR Parlamentinde qabyldanǵan zań mıtıngilerdi ótkizýdiń habarlama tártibin engizedi jáne artyq bıýrokratııany joıý maqsatynda mıtıngilerdi ótkizýge ótinim berý rásimin jeńildetedi. Josparlanǵan is-sharalar týraly habarlaý merzimderi, sondaı-aq atqarýshy bılik organdarynyń ótinimdi qaraý merzimderi aıtarlyqtaı qysqardy. Jýrnalısterdiń jumysyn uıymdastyrý tásilderiniń ózgerýi de mańyzdy bolyp tabylady. Jańa Zań jýrnalısterdiń qyzmetin shekteıtin qandaı da bir tyıym salýlar men mindetterdi qamtymaıdy», - dedi Zarema Sháýkenova.
Instıtýt dırektorynyń aıtýynsha, Zańdy daıyndaý protsesinde mıtıngilerdi ótkizý oryndaryn anyqtaý tásilderine erekshe nazar aýdaryldy. Zańǵa sáıkes pıketter zań normalarymen tyıym salynbaǵan kez kelgen jerde ótkizilýi múmkin. Mıtıngterge keletin bolsaq, olar úshin qalanyń nemese aýyldyń ortalyq aýdandarynda arnaıy oryndar bólinýi tıis. Olardy anyqtaý kezinde jergilikti bılik ótkiziletin jınalystar mıtıngige qatyspaıtyn azamattardyń kúndelikti ómirine jaǵymsyz áser etpeıtinin aldyn ala oılaýy qajet.
«Jınalystyń jekelegen qatysýshylarynyń is-áreketi orynsyz nemese zańdardy buzatyn bolsa, bul jınalystyń ózin toqtatýǵa negiz bolmaıtyndyǵy mańyzdy bolyp tabylady. Zań beıbit jınalystardy uıymdastyrýshylar men qatysýshylardyń densaýlyǵyn saqtaý maqsatynda jeke qorǵaný quraldaryn paıdalaný quqyǵyn bekitedi. Jańa epıdemıologııalyq jaǵdaıda tulǵany jasyratyn jáne qatysýshylardyń bet-álpetin tanýǵa kedergi keltiretin kıimdi qoldanbaý týraly talap mıtıng ótkizý quqyǵyna kedergi keltirýi nemese azamattardyń densaýlyǵyna qaýip tóndirýi múmkin. Sondyqtan bul norma Zańnan alyndy», - dedi sarapshy.
Onyń aıtýynsha, Zań jobasy ony daıyndaýdyń barlyq satylarynda ártúrli qoǵamdyq alańdarda belsendi talqylandy, parlamenttegi jumys toptarynyń barlyq otyrystary ÚEU ókilderiniń, quqyqtanýshy ǵalymdardyń, saıasattanýshylar men sarapshylardyń qatysýymen ashyq jáne jarııa túrde ótti. Qujatqa qatysty jumys únemi BAQ-ta jarııalanyp otyrdy.
«Senattyń jekelegen normalardy jaqsartýǵa baǵyttalǵan barlyq usynylǵan túzetýleri Májilis maquldaǵan zań jobasynyń tujyrymdamasy men mazmunyna ózgeris engizbeıdi. Parlament qabyldaǵan «Qazaqstan Respýblıkasynda beıbit jınalystar uıymdastyrý jáne ótkizý tártibi týraly» Zań QR Prezıdentiniń qol qoıýyna berildi», - dedi ınstıtýt basshysy.
Aıta keteıik, búgin Májilis depýtattary «QR-da beıbit jınalystardy uıymdastyrý jáne ótkizý tártibi týraly» zań jobasyna Parlament Senaty engizgen ózgerister men tolyqtyrýlardy qoldap, daýys berdi.
