Mıtıng ótkizýge qatysty barlyq máseleler retteldi - Aıdos Sarym

ALMATY. QazAqparat – Beıbit jınalystar ótkizý - eldiń saıası protsesi men saıası mádenıetiniń bir bóligi. Mundaı pikirdi QR Parlamenti Májilisiniń depýtaty Aıdos Sarym «Beıbit jınalystar týraly jańa zańnyń qoldanysyna sholý» taldamaly baıandamasynyń tanystyrylymy kezinde aıtty, dep habarlaıdy Qazqparat tilshisi.

Aıdos Sarym óz sózinde el Prezıdenti qabyldaǵan zań jobalaryn talqylaý jaqsy dástúrge aınalǵanyn atap ótti.

«Búgin biz beıbit jınalystardy ótkizý týraly zańdy talqylap jatyrmyz. Meniń oıymsha, bul óte jaqsy dástúr. Óıtkeni Ulttyq qoǵamdyq senim keńesinde maqtanatyn nárse bar. Naqty jetistikter, naqty zań jobalary bar, olar qazirdiń ózinde zań túrinde resimdelgen. Olar qabyldanady, ratıfıkatsııalanady jáne oryndalyp jatyr. Bizdiń elde mıtıng, pıket ótkizýge degen kózqaras túbegeıli ózgerdi. Eger osydan eki- úsh jyl buryn halyq mıtıngiden úreılense, búgingi kúni ol saıası sharaǵa aınaldy. Eń bastysy jańa tártip ornady. Ol burynǵysyna qaraǵanda álde qaıda jumsaq, demokratııaly desekte bolady»,- deıdi depýtat.

Sonymen qatar, ol qazir úlken is -sharalardy ótkizýge pandemııa kedergi keltirip jatqanyn aıtty.

«Qazir ár qalada mıtıng ótkizetin oryndar sany kóbeıdi. Pandemııanyń shekteýi demesek, negizi mıtıng qarapaıym, saıası quralǵa aınaldy dep aıtýǵa bolady. Zań qabyldanǵan kezdegi basty mindet - zańdy oryndaý zańdy oryndamaýdan tıimdi bolý kerek. Menińshe bul prıntsıp bar. Eger, eshqandaı kedergisiz, zań talabynda mıtıng ótkizetin bolsańyz eshqandaı shekteý bolmaıdy. Mıtıng ótkizýge qatysty barlyq máseleler retteldi. Beıbit jınalystar ótkizý - eldiń saıası protsesi men saıası mádenıetiniń bir bóligi desek te bolady»,- deıdi Aıdos Sarym.

Eske salaıyq, Almatyda tanymal sarapshylar beıbit jınalystar týraly zańnyń nátıjesin talqylap jatyr.