«Mıster Olımpııa» básekesine qatysqan tuńǵysh qazaq: elimdi álemdik arenada tanytqanymdy maqtan tutamyn
ASTANA. KAZINFORM - Daryn Shırbaev halqaralyq jarystarda el namysyn qorǵap júrgen qazaqstandyq bodıbılder. Ol bodıbıldıngten ótken halyqaralyq týrnırde top jaryp, 2025 jylǵy «Mıster Olımpııa» básekesine joldamany jeńip aldy.
- Meniń bodıbıldıngtegi kásibı mansabym 2023 jyly bastaldy. Sol jyly men AQSh-ta birinshi ret kásipqoılar arasynda halqaralyq jarysqa qatystym. Meniń qarsylastarym – kóp jyldyq tájirıbesi bar úzdik sportshylar jáne «Mıster Olımpııa» básekesiniń qatysýshylary boldy. Soǵan qaramastan men úshinshi oryn aldym. Debıýtant úshin mundaı nátıje jaı ǵana jetistik emes, naǵyz serpilis,- dedi sportshy.
Aıta keterligi, Daryn Shırbaev «Mıster Olımpııa» básekesine qatysqan tuńǵysh qazaq sportshysy. Ol AQSh-tyń Las-Vegas qalasynda ótken 60-kezekti «Mıster Olımpııa» básekesinde óner kórsetti.
- Osy aty ańyzǵa aınalǵan týrnırde men «Klassıkalyq fızık» atalymynda baq synaǵan tuńǵysh qazaq boldym. Bul meniń ómirimdegi eń jarqyn sátterdiń biri, máńgi este qalatyn tarıhı oqıǵa boldy. Men óz elimdi álemdik arenada tanytyp, qazaq bodıbıldınginiń joǵary deńgeıde básekege túse alatynyn kórsetkenimdi maqtan tutamyn, - dedi Daryn Shırbaev.
Qazaqstandyq bodıbılder 2 qarasha Almaty qalasynda ótken halyqaralyq týrnırde top jaryp, 2025 jylǵy «Mıster Olımpııa» básekesi «Klassıkalyq fızık» sanatynda óner kórsetetin 24 sportshy qatarynan kórindi.
- Dál qazir men 2025 jylǵy «Mıster Olımpııa» básekesine daıyndalyp jatyrmyn. Alda áli talaı jeńister kútip turǵanyna senimdimin jáne Qazaqstannyń dańqyn álemdik arenada asqaqtatyp, jańa chempıondardy shabyttandyrý úshin bárin jasaımyn, - dedi Daryn Shırbaev.
2025 jylǵy «Mıster Olımpııa» týrnıri AQSh-tyń Las-Vegas qalasynda ótedi.
Aıta keteıik, Daryn Shırbaev 1989 jyly 10 qarashada Almaty oblysynda dúnıege kelgen. Bul kúnde ol kásibı bodıbıldıngpen qatar jattyqtyrýshy bolyp jumys isteıdi.
Osyǵan deıin Baıan-Ólgeı qazaǵy bodıbıldıngten «Mońǵol mısteri» atanǵanyn jazǵanbyz.
