Mıssýrı polıtsııasy jasóspirimdi atqan polıtseıdiń atyn atady
ASTANA. QazAqparat - AQSh-tyń Mıssýrı shtatynyń polıtsııasy Fergıýson qalasynda qara násildi jas jigitti atyp óltirgen polıtseıdiń aty-jónin jarııa etti. Bul týraly RIA «Novostıge» siltememen egemen.kz habarlady.
Mıssýrı shtaty Fergıýson polıtsııasynyń bastyǵy Tom Djekson NBC telearnasyna bergen suhbaty barysynda ótken jeksenbi kúni qara násildi jasóspirimdi tapanshamen atyp tastaǵan polıtseıdiń kim ekenin aıtyp berdi. Djeksonnyń málimetinshe, bozbalany oqqa baılaǵan Darren Ýılson bolyp shyqty. Onyń polıtsııada jumys istep kele jatqanyna alty jyl bolypty.
Polıtseı 10 tamyz kúni 18 jasar qara násildi jigit Maıkl Braýndy Mıssýrı shtatynyń Sent-Lýıs qalasynyń shetindegi Fergıýson eldi mekeninde atyp tastaǵan. Osy oqıǵadan keıin narazy bolǵan jurt kóshege shyǵyp, adam ólimine sebepker bolǵan kopty jazalaýdy talap etti. Mundaı sherýlerdiń sońy polıtsııa men jurttyń qaqtyǵystaryna aparyp soqtyrdy.
Artynsha bul dúmpý Amerıkanyń kóptegen qalalaryna tarap ketti. Beısenbi jáne juma kúnderi adam ólimine baılanysty qarsylyq aktsııasy Shtattardyń 90 qalasyn qamtydy.
