Mıssıonerlik qandaı jaǵdaıda quqyq buzýshylyqqa aınalady
ASTANA. KAZINFORM – QR Mádenıet jáne aqparat mınıstrliginiń Din isteri komıteti resmı saýalymyzǵa joldaǵan jaýabynda elimizdegi mıssıonerlik erejeleri jóninde málimdedi.
Komıtet aldymen mıssıonerlik uǵymyna anyqtama berdi.
– Zań talaptaryna sáıkes, mıssıonerlik qyzmet – QR azamattarynyń, sheteldikterdiń, azamattyǵy joq adamdardyń dinge úndeý maqsatynda QR aýmaǵynda dinı ilimdi taratatyn qyzmeti. Al dinı ilimdi taratý – belgili bir dinniń negizgi dogmattary, ıdeıalary, kózqarastary jáne praktıkalary týraly aqparatty jetkizýge, málimet berýge baǵyttalǵan qyzmet, – delingen habarlamada.
Mıssıonerlikpen aınalysý úshin azamattar tirkeýden ótýi qajet. Tirkelmeı, mıssıonerlikpen shuǵyldansa, zań buzýshylyq bolyp esepteledi.
– Mıssıoner retinde tirkelmegen tulǵa óz konfessııasyna úndese, basqa senim ókilderine óz senimi týraly aqparat berse, mundaı jaǵdaılar quqyq buzýshylyq bolyp sanalady, – delingen resmı jaýapta.
Aıta keteıik, bıyl sheteldik mıssıonerler tarapynan 10 quqyq buzýshylyq tirkelgenin jazǵanbyz.
