Miss World 2026 baıqaýyna Qazaqstan atynan kim qatysady
ALMATY. KAZINFORM — Almatyda halyqaralyq Miss World 2026 baıqaýy aldyndaǵy daıyndyqqa arnalǵan baspasóz máslıhaty ótti.
Bıyl Miss Qazaqstan 2024 tıtýlynyń ıegeri Baǵym Baltabaeva 73-shi halyqaralyq Miss World 2026 baıqaýyna Qazaqstan atynan qatysady. Osy jyly baıqaý alǵash ret Vetnamda ótedi. Bul is-shara álemniń 130-ǵa jýyq memleketiniń ókilderin biriktirmek. Olar Beauty With a Purpose (maǵynaly sýlýlyq) fılosofııasyna sáıkes, óz memleketterin, ulttyq mádenıeti men áleýmettik bastamalaryn tanystyrady.
— «Miss Qazaqstan» sulýlyq baıqaýy 1997 jyldan beri ótkizilip keledi, al kelesi jyly biz onyń mereıtoıyn atap ótemiz. Miss World baıqaýy bolsa, 1951 jyldan beri uıymdastyrylyp keledi jáne bıyl óziniń 75 jyldyǵyn toılaıdy. Bul — álemdegi eń kóne ári eń aýqymdy sulýlyq baıqaýy. Bul jaı ǵana sulýlyq saıysynan áldeqaıda tereńirek. Onyń negizinde Beauty With a Purpose fılosofııasy jatyr. Munda qatysýshylardyń tek syrtqy kelbeti ǵana emes, sondaı-aq olardyń jeke qasıetteri de baǵalanady. Onda qatysýshylar tanystyratyn qaıyrymdylyq jobalary da mańyzǵa ıe. Sondyqtan ulttyq baıqaýlardyń jeńimpazdary jyl boıy qaıyrymdylyqpen aınalysady, — dedi «Miss Qazaqstan» baıqaýynyń dırektory Ramına Ibragımova.
Baǵym Baltabaeva — Óskemen qalasynyń týmasy. Ol Sársen Amanjolov atyndaǵy Shyǵys Qazaqstan ýnıversıtetin «Bastaýysh synyp pedagogi» mamandyǵy boıynsha aıaqtaǵan. Boıjetken 7 tamyz kúni Vetnamǵa attanyp, onda 1 aı boıy halyqaralyq mádenı sharalarǵa jáne Miss World bastamalaryna qatysady. Elge oralýy 7 qyrkúıekke josparlanǵan.
Halyqaralyq baıqaýda Qazaqstandy tanystyratyn arý jalǵyzbasty analar men ómirlik qıyn jaǵdaıǵa tap bolǵan kópbalaly otbasylardy qoldaýǵa baǵyttalǵan jumystarǵa erekshe kóńil bólgenin aıtty.
Sonymen qatar ol baıqaýdyń negizgi kezeńderiniń biri — ulttyq kıimdi tanystyrý bólimine erekshe daıyndalǵan. Baǵym Baltabaeva bıyl qazaq áıeliniń beınesin jańa baǵytta tanystyrýdy josparla otyrǵanyn atap ótti.
— Buǵan deıin qazaq áıelderin kóbine jaýynger Tomırıs beınesi arqyly tanystyrsa, men álemge olardyń sulýlyǵyn, náziktigin, danalyǵy men ishki garmonııasyn kórsetkim keledi. Meniń ulttyq kıimimniń negizi retinde tazalyq pen adaldyqtyń sımvoly — aqqý beınesi alyndy. Aqqý — Qazaqstannyń tabıǵaty men mádenı murasynyń ajyramas bóligi jáne ol Kaspıı teńizimen de tyǵyz baılanysty. Osy beıne arqyly men qazaq áıeliniń náziktigin, abyroıyn jáne baı ishki álemin jetkizgim keledi, — dedi Baǵym Baltabaeva.
Eske salaıyq, byltyr «Álem arýy» baıqaýyndaǵy janjal shyqqan edi. Taıland eliniń resmı ókili «Meksıka arýyn» kópshiliktiń kózinshe balaǵattaǵany úshin baıqaýǵa qatysýshy birneshe eldiń ókili is-sharadan ketip qaldy.
