Miss Virtual World arýy atanǵan qazaqstandyqtyń táji Meksıkadan jetkizildi

Jaqynda qazaqstandyq boıjetken Meksıkadan jetkizilgen tájimen fotosessııa uıymdastyrdy.

21 jastaǵy Araılym Ishahat Atyraý oblysy Inder aýdanynda týǵan. Nur-Sultan qalasynda medıtsınalyq ýnıversıtetti bitirgen. Baıqaý jarııalanǵan kezde Araılym oqý ornyn jańadan bitirgen jas maman bolǵan.

Ony konkýrsqa sýret jiberýge ápkesi kóndirgen kórinedi. Baıqaýǵa qatysýǵa ótinish bergen soń boıjetken memlekettik organda statıstıka bólimine bas maman bop jumysqa ornalasady.

«Men ápkemniń aıtqanyn tyńdap, sýretimdi jibere saldym. Jaı ǵana qarapaıym úı kıimimen túsken sýret bolatyn. Birinshi kezeńnen ótkende tań qaldym. Osylaısha Qazaqstannyń Vırtýaldy Arýy atandym. Biraq ulttyq kezeńniń jeńimpazdarynyń barlyǵy birdeı fınalǵa ótken joq. Arada taǵy ınternet arqyly daýys berý protsesi júrdi. Meniń sýretterim jetkilikti daýys jınap, Meksıkada ótetin Álemniń vırtýaldy arýy marapattaý sharasyna shaqyrtý aldym. Halyqaralyq baıqaýǵa shyqqanda sapaly fotolarymdy jiberýge tyrystym. Meksıkaǵa barý úshin tipti memlekettik qyzmettegi jumysymnan ketýime týra keldi. Baıqaý nemese jumysty tańdaý kerek boldy. Biraq, men táýekelge bel býdym. Bul bir berilip turǵan múmkindik bolar, al jumys qashanda tabylady dep oıladym», - dedi Araılym.

Dúbirli dodanyń marapattaý sharasy Meksıkanyń Kankýn qalasynda 15 qarashada ótken.

Araılymdy ata-anasy muhıttyń arǵy betindegi Meksıkaǵa jalǵyz jibergisi kelmegen.

«Ata-analarym tanymaıtyn elge jalǵyz ózimdi jibergisi kelmedi. Biraq olar meniń tańdaýymdy baǵalady. Meksıkaǵa jolǵa shyqtym. Tokıo arqyly ushyp bara jatqanda vızam durys bolmaǵandyqtan, meni reısten túsirip aldy. Sol kezde qatty jyladym, aýyr kóılekterim salynǵan sómkelerimdi kóterip Qazaqstanǵa qatyp kelýime týra keldi. Sosyn nege bara almaǵanym týraly baıqaý uıymdastyrýshylaryna vıdeoúndeý jiberdim», - dedi Araılym.

Baıqaý uıymdastyrýshylary marapattaý sharasy bolatyn kezde Araılymdy skaıp arqyly baılanysqa shyǵýyn ótingen.

«Sosyn tańǵy saǵat 5-te shetelden qońyraý keldi. Uıyqtap jatqanmyn. Maǵan tikeleı efırge shyǵýymdy surady. Aq fýtbolkamen shyǵýyma bola ma degenimde, bolmaıdy, daıyndyq kerek dedi. Men tez arada qazaqtyń ulttyq kıimin kıip, boıanyp úlgerdim. Birneshe saǵattyń ishinde tez daıyndalyp, evırge qosyldym. Ekinshi oryn reseılik arý - Alena Portnıagınaǵa buıyrdy. Birinshi oryn Araılym Ishahat degende tipti tańdanystan únsiz qaldym. Ar jaǵynda júrgizýshiler meniń reaktsııamdy kútip jatyr. Men eshteńe aıta alar emespin. Tańdanystan tolqyǵanym sonsha, biraz ýaqytqa deıin deıin oıymdy aıta almaı qaldym», - dedi boıjetken.

Marapattaý saltanatyna jeńimpazdyń kelmegeni qatysýshylar arasynda daý týǵyzǵan. Kóptegen qatysýshylar baıqaýdy uıymdastyrýǵa usynys jasap, ınternet arqyly berilgen daýystyń ádil sanalǵanyna kúmán keltirgen.