Mysyrdyń Dýmıat portyndaǵy eki gaz kemesine dron shabýyl jasady
ASTANA. KAZINFORM – Mysyr bıligi Jerorta teńizi jaǵalaýyndaǵy Dýmıat portynda turǵan eki gaz kemesindegi órttiń ushqyshsyz ushý apparatynyń shabýylynan bolǵanyn málimdedi, dep habarlaıdy Kazinform agenttiginiń menshikti tilshisi.
Mysyr Mınıstrler kabınetiniń málimetinshe, mundaı qorytyndyǵa quzyrly organdar aldyn ala júrgizilgen tergeý nátıjesinde kelgen.
Úkimet ázirge oqıǵa úshin jaýapkershilikti eshbir tarap óz moınyna almaǵanyn atap ótti. Tergeý jalǵasyp jatyr, al bılik ulttyq qaýipsizdik pen el múddesin qorǵaý úshin qajetti sharalardy qabyldaýda.
– Oqıǵaǵa qatysty tergeý jalǵasýda. Mysyrdyń ulttyq qaýipsizdigi men múddesin qorǵaýǵa baǵyttalǵan barlyq qajetti shara qabyldanyp jatyr, – delingen úkimet habarlamasynda.
Ulybrıtanııanyń teńiz qaýipsizdigi men keme qatynasy táýekelderin baǵalaýmen aınalysatyn Ambrey kompanııasynyń málimetinshe, dron amerıkalyq Energos Infrastructure kompanııasyna tıesili suıytylǵan tabıǵı gazdy saqtaý jáne qaıta gazdandyrýǵa arnalǵan Energos Winter qalqymaly kemesine soqqy jasaǵan. Sonyń saldarynan shyqqan órt Gaslog Salem kemesine de taraǵan.
Mysyrdyń Munaı mınıstrligi jalynnyń órt sóndirýshiler men qaýipsizdik qyzmetteriniń kúshimen jedel oqshaýlanǵanyn habarlady.
– Resmı málimet boıynsha, oqıǵa saldarynan qaza tapqandar men zardap shekkender joq, – dep málimdedi mınıstrlik.
Oqıǵa ornyna Mysyrdyń Munaı mınıstri Karım Badaýı baryp, apat saldaryn joıý jumystaryn baqylaýǵa aldy.
Bul oqıǵa AQSh pen Iran arasyndaǵy ózara soqqylardan keıin Taıaý Shyǵystaǵy jaǵdaıdyń shıelenisken kezeńinde boldy. Alaıda Mysyr bıligi shabýyldy qandaı da bir tarappen baılanystyrmaı, tergeý jalǵasyp jatqanyn málimdedi.
Aıta keteıik, Túrkııa men Mysyrdyń qorǵanys salasyndaǵy áriptestigine Grekııa alańdaı bastady.
