Mysyrdan Gaza sektoryna 36-shy kómek kerýeni attandy

ASTANA. KAZINFORM — Mysyr jeksenbi kúni Izraıl ákimshiliginiń tekserýinen keıin «Rafah» baqylaý beketinen «Kerem‑Shalom» baqylaý beketine qaraı Gaza sektoryna ótetin gýmanıtarlyq kómektiń jańa kolonnasyn jóneltti, dep jazady Sınhýa.

Bul týraly Mysyr memlekettik telearnasy málimdedi.

27 shildeden beri Mysyr Qyzyl Aı qoǵamynyń bastamasymen Gazany qoldaý maqsatynda uıymdastyrylǵan 36-shy gýmanıtarlyq kómek kolonnasy jolǵa shyqty.

Azyq-túlik (kúrish, makaron, un jáne balalar taǵamy), dári-dármek pen medıtsınalyq jabdyq tıelgen gýmanıtarlyq kómek kerýeni tańsáride attandy.

Aldyńǵy, ıaǵnı 35-shi gýmanıtarlyq kerýen beısenbi kúni jóneltilgen. Ol alǵash ret úıleri qırap nemese zaqymdanǵan palestınalyq bosqyndardyń jaǵdaıyn jeńildetý úshin mobıldi dárethanalarmen jabdyqtalǵan bolatyn.

Habarlamada gýmanıtarlyq kómektiń bir bóligi Sınaı túbegi turǵyndarynyń palestınalyqtarǵa arnap jınaǵan qaıyrymdylyqtarynan quralǵany aıtyldy. Sonymen qatar, Mysyr Qyzyl Aı qoǵamy Gazaǵa kómek jibergisi keletin basqa eldermen de úılestirý jumystaryn júrgizip jatyr.

Gazadaǵy densaýlyq saqtaý organdarynyń sońǵy derekterine sáıkes, Izraıldiń áskerı naýqany saldarynan Gazada 64 871 palestınalyq qaza tapqan, taǵy 164 610 adam jaraqattanǵan. Infraqurylymǵa úlken zardap keltirilgen jáne gýmanıtarlyq jaǵdaı nasharlaǵan.

Sonymen qatar, ashtyq pen jetkiliksiz tamaqtaný saldarynan gazalyqtar arasynda 422 adam, onyń ishinde 145 bala qaıtys bolǵan. Bul Izraıl men HAMAS arasyndaǵy qaqtyǵys 2023 jylǵy 7 qazanda bastalǵannan beri tirkelgen derek.

Qaqtyǵys bastalǵaly Mysyr Gazaǵa jetkizilgen gýmanıtarlyq kómektiń 70 paıyzdan astamyn qamtamasyz etti. 550 myń tonnadan astam azyq-túlik pen dári-dármek myńdaǵan júk kóligimen jetkizilgen. Qazirgi ýaqytta Rafah baqylaý-ótkizý beketinde Izraılden ruqsat kútip turǵan shamamen 5 myńǵa jýyq kólik kezekte tur.

Budan buryn Izraıldiń qarqyndy soqqylarynan keıin Gazadan 300 myńnan asa turǵyn ketkenin jazǵan edik.