Mysyrdaǵy jańa shekteýler týrısterge áser ete me

ASTANA. KAZINFORM — Taıaý Shyǵystaǵy qaqtyǵys saldarynan energııa baǵasynyń kúrt ósýine qarsy kúres boıynsha ýaqytsha sharalar aıasynda Mysyrdaǵy dúkender, meıramhanalar men dámhanalarǵa ádettegiden erterek jabylýǵa buıryq berildi, dep habarlaıdy VVS. 

4 sáýirden bastap bul mekemeler aı boıy jergilikti ýaqyt boıynsha keshki saǵat 21:00–de jabylýy tıis. 

Mysyr úkimeti engizgen «erekshe sharalar» qataryna kóshe shamdary jáne jol jıegindegi jarnamalar jaryǵyn azaıtý, sondaı-aq kóptegen kásiporyndardyń sáýir aıynda aptasyna bir kún úıden jumys isteýge oralýyn talap etý kirdi.

Úkimettiń málimdeýinshe, qonaq úıler men týrıstik oryndar energııa únemdeý sharalarynan bosatylady. 

Alaıda Kaırdegi birneshe qonaq úı elektr qýaty óshken jaǵdaıda generatorlar satyp alǵanyn jáne basqa mekemelerdiń jabylý ýaqytyna qaramastan meıramhanalaryn qonaqtar úshin ashyq ustaıtynyn habarlady.

Mysyr Taıaý Shyǵystaǵy qaqtyǵystan jáne munaı men suıytylǵan tabıǵı gazdyń negizgi tasymaldaý joly — Ormýz buǵazynyń is júzinde oqshaýlanýynan qatty zardap shekti.
Sý joly arqyly tasymaldanatyn jetkizilim tolyǵymen derlik toqtatylǵannan beri álemdik munaı baǵasy kúrt ósti, bul azyq-túlik, dári-dármek jáne basqa da taýarlar baǵasyna teris áser etýi múmkin degen alańdaýshylyq týdyrdy.

Mysyr premer-mınıstri Mustafa Madbýlıdiń málimdeýinshe, eldegi benzın baǵasy qańtar aıynan beri eki eseden astam ósip, naýryz aıynda 2,5 mlrd dollarǵa jetken.
Osyǵan baılanysty el úkimeti qoǵamdyq kólikpen júrý aqysyn kóterdi.

Eske sala ketsek, elimizdiń Syrtqy ister mınıstrligi Mysyr Arab Respýblıkasynyń barýǵa usynylmaıtyn memleketter tiziminen shyǵarǵanyn habarladyq.