Mysyrda shamamen eki myń jyl burynǵy 23 mýmııa tabyldy
Ispandyq arheologtar El-Bahnasa qalasynda alǵash ret altyn jáne túrli tústi jerleý maskalary bar mýmııa túrindegi shamamen 2 myń jyl burynǵy qorymdardy tapty. Olardyń ekeýiniń aýzynda altyn tilderi bar. Kazinform bul týraly TASS aqparat agenttigine silteme jasap habarlaıdy.
Sada al-Balad portalynyń habarlaýynsha, Ptolemeı áýletiniń (b.z.d. 305 - b.z.d. 30 j.) jáne Mysyrǵa Rım bılik etken kezinde (b.z.d. 30 j.) jerlengen barlyǵy 23 mýmııa tabyldy.
Qorymdar El-Bahnasa joǵarǵy zıratynyń shyǵys bóliginen tabylǵan. Topyraqta qazylyp, taspen qaptalǵan qudyq túbinde ólilerdi jerleýge arnalǵan bólmeler bar: osy bólmelerdiń birinde bos bolǵan sarkofagtar, al ekinshisinde mýmııalardyń ózderi bolǵan. Mýmııalardyń sarkofagtarǵa nelikten jerlenbegeni týraly aqparat berilgen joq.
23 mýmııanyń ekeýiniń aýzynda til tárizdi altyn tilimshe bar. Arheologtardyń aıtýynsha, ólgenderdi jerleýdiń bul dástúri Rım bıligi kezinde keńinen qoldanylǵan.
Jerlengenderdiń jeke basy áli anyqtalǵan joq. Alaıda olardyń jerlengen jerinen bir kezderi jerleý ornynda turǵan ǵımarat qabyrǵalarynyń qaldyqtary tabyldy. Ǵalymdar úıindi synyqtarynan janýarlar, qustar, sondaı-aq jemis-jıdek beıneleri bar sýretter tapty.
Sonymen qatar ǵalymdar qazba ornynda basyna gúldeste men táji bar Isıda-Afrodıta áıel-qudaıdyń kúıdirilgen saz músinin tapty. Mundaı músinder El-Bahnasadan birinshi ret tabylyp otyr. Arheologtar basqa oljalardy izdeý úshin qazba jumystaryn jalǵastyryp jatyr, dep atap ótti Sada al-Balad portalynan.
Qazirgi El-Bahnasa ejelgi dáýirde Oksırınh (Pemdje) qalasy bolǵan jerge jaqyn ornalasqan. Ol Ptolemeı dáýirinde Mysyr ellındik memlekettiń úshinshi iri qalasy boldy.
