Mysyrda poıyzdardyń soqtyǵysýynan qaza tapqandar sany jetige jetti
ASTANA. KAZINFORM — Mysyrdyń Gıza provıntsııasynda bolǵan temirjol apatynan qaza tapqandar sany naqtylandy. Sońǵy málimet boıynsha, jeti adam kóz jumyp, taǵy 112 adam jaraqat alǵan, dep habarlaıdy TASS.
Mysyr Densaýlyq saqtaý mınıstrliginiń habarlaýynsha, zardap shekken 45 adam aýrýhanadan shyǵarylǵan. Taǵy jeti naýqastyń jaǵdaıy jaqsarýyna baılanysty medıtsınalyq mekemelerden shyǵýǵa daıyndalyp jatyr.
Apat 8 qarasha kúni tańerteń El-Aııat qalasynyń mańynda bolǵan. Gızadan Faıýmǵa baǵyt alǵan jolaýshylar poıyzy Kaırden Asýanǵa bara jatqan ekinshi poıyzdyń artqy bóligine soǵylǵan. Soqtyǵys saldarynan birneshe vagon relsten shyǵyp ketken.
Mysyr prezıdenti Abdel Fattah ás-Sısı qaza tapqandardyń otbasylaryna kóńil aıtyp, apattyń mán-jaıyn tergeýdi tapsyrdy. Sondaı-aq memleket basshysy qaıǵyly oqıǵaǵa sebep bolǵan salǵyrttyqqa jol bergenderdiń barlyǵyn jaýapqa tartýdy talap etti.
Oqıǵa ornynda medıtsınalyq qyzmetter, Mysyr Qyzyl Jarty aı qoǵamynyń qyzmetkerleri jáne eldiń Bas prokýratýrasy jumys istep jatyr.
Buǵan deıin Mysyrdyń Masrawy aqparattyq portaly apattan keminde 150 adam zardap shekken bolýy múmkin ekenin habarlaǵan edi. Keıin Mysyr Densaýlyq saqtaý mınıstrligi tórt adamnyń qaza taýyp, 88 adamnyń jaraqat alǵanyn málimdedi. Endi vedomstvo qaza tapqandar men zardap shekkender týraly málimetti taǵy da jańartty.