Mysyrda perǵaýyn murageriniń qabiri tabyldy
KAIR. KAZINFORM – Kaırdiń ońtústiginde arheologtar V áýlettiń alǵashqy bıleýshisi bolǵan perǵaýyn Ýserkaftyń uly – hanzada Ýserefranyń qabiri men III áýlettiń negizin qalaýshy perǵaýyn Djoserdiń, onyń jubaıy men on qyzynyń músinderin tapty. Bul jóninde Mysyrdyń Týrızm jáne ejelgi mura mınıstrligi habarlady, dep 24.kg jazdy.
Mınıstrliktiń málimetinshe, Zahı Havass atyndaǵy Ejelgi mura men muraǵat qory sondaı-aq Joǵarǵy ejelgi eskertkishter keńesiniń basshylyǵymen jumys istegen birlesken mysyrlyq arheologııalyq ekspedıtsııa Sakkara aımaǵynda júrgizilgen qazba jumystary kezinde Ýserefra hanzadanyń qabirin tapqan. Sondaı-aq bul jerde sol dáýirge jáne odan keıingi kezeńderge jatatyn mańyzdy arheologııalyq oljalar tabylǵan.
Arheologııalyq nysanda kóptegen ıeroglıf jazbalar bar. Olardyń birqatary marqum hanzadanyń esimi men ataqtaryn sıpattaıdy. Mysaly, onda «murager hanzada, Býto men Nehbet aımaqtarynyń bıleýshisi, patsha hatshysy, mınıstr, sýdıa jáne dinı qyzmetker» degen ataqtar kezdesedi.
Qazba barysynda ǵalymdar bıiktigi 5 metrge jýyq jáne eni 1 metrden asatyn qyzǵylt granıtten jasalǵan jalǵan esik tapqan. Joǵarǵy keńestiń málimdeýinshe, mundaı iri jalǵan esik buryn-sońdy esh jerde tabylǵan emes.
Eske sala keteıik, Qazaqstanda arheologııalyq oljany jymqyrǵandarǵa jaza kúsheıtini týraly jazǵan bolatynbyz.