Mysyrda parlamenttik saılaýdyń alǵashqy kezeńi bastaldy
ASTANA. KAZINFORM — Mysyrda parlamenttik saılaýdyń bastalýy eldiń jańa tómengi palata quramyn qalyptastyrýǵa baǵyttalǵan saıası tsıkldiń mańyzdy kezeńi boldy, dep habarlaıdy Kazinform agenttiginiń menshikti tilshisi.
Dúısenbi kúni Mysyrda Ókilder palatasyna — parlamenttiń tómengi palatasyna — saılaýdyń birinshi kezeńi bastaldy. Egıpettiń Al-Qahera News telearnasy habarlaǵandaı, daýys berý eki kezeńnen turady, al jalpy saılaýshylar sany 63 mıllıonnan asady.
Saılaýdyń birinshi kezeńi Aleksandrııa, Gıza, Lýksor, Asýan, Faııým jáne Benı-Sýeıf sekildi 14 provıntsııany qamtıdy. Daýys berý eki kún boıy 70 saılaý okrýgindegi 5606 saılaý ýchaskesinde ótedi.
Saılaýǵa 1287 kandıdat qatysyp jatyr: olardyń 1143-i majorıtarlyq júıe boıynsha, al 142-si partııalyq tizim arqyly baq synaıdy.
Mysyrdyń Ulttyq saılaý komıssııasynyń derekterine sáıkes, osy provıntsııalardaǵy tirkelgen saılaýshylardyń jalpy sany 35 mıllıonnan asady. Eń kóp saılaýshy Gıza provıntsııasynda — 6,6 mln, Aleksandrııada — 4,5 mln jáne Beheırde — 4,3 mln adam.
Saılaý komıssııasynyń atqarýshy dırektory Ahmed Bendarı saılaýǵa daıyndyqtyń tolyq aıaqtalǵanyn málimdedi: ýchaskelerde azamattardyń yńǵaılylyǵy úshin QR-kodtar engizilgen jáne saılaý ýchaskesin tabýǵa múmkindik beretin elektrondyq qosymsha iske qosylǵan.
— Bizdiń maqsatymyz — daýys berý úderisin barynsha ashyq ári azamattar úshin yńǵaıly etý, — dedi ol.
Mysyrdyń Іshki ister mınıstrligi qaýipsizdik josparynyń júzege asyrylyp jatqanyn habarlady. Ol kúsheıtilgen polıtsııa kezekshiligin, jedel áreket etý toptaryn jáne ýchaskelerde tártipti qamtamasyz etý úshin áıel polıtsııa qyzmetkerlerin qamtıdy. Densaýlyq saqtaý mınıstrligi 1300 jedel járdem kóligin jáne shamamen 4 myń medıtsına qyzmetkerin jumyldyrdy.
Múmkindigi shekteýli azamattardyń qatysýyna erekshe kóńil bólingen. Múgedekter isteri jónindegi ulttyq keńes saılaý ýchaskeleriniń qoljetimdiligin baqylaý jáne ym tili arqyly qoldaý kórsetý úshin jedel ortalyq ashty.
Mysyr parlamenti eki palatadan turady — Ókilder palatasy jáne Senat. Tómengi palatada barlyǵy 596 oryn bar: onyń 568-i partııalyq tizim men jeke saılaý okrýgteri arqyly teń bólinip saılanady, al 28-in el prezıdenti taǵaıyndaıdy.
Saılaýdyń ekinshi kezeńi 24–25 qarashada qalǵan 13 provıntsııada ótedi. Al shetelde turatyn mysyrlyqtar 7–8 qarashada 117 elde daýys berdi.
Birinshi kezeńniń nátıjeleri 18 qarashada, al ekinshi kezeńniń qorytyndylary 2 jeltoqsanda jarııalanady. Qazirgi Ókilder palatasy 2020 jyldyń sońynda saılanǵan, onyń ókilettik merzimi 2026 jyldyń qańtarynda aıaqtalady.
Budan buryn Izraıl Mysyrmen shekaranyń bir bóligin jabyq áskerı aımaq dep jarııalaǵanyn jazǵanbyz.