Mysyrda parlament saılaýynyń ekinshi kezeńi ótip jatyr

ASTANA. KAZINFORM – Elde parlamentke daýys berý kezeń-kezeńimen jalǵasyp otyr, dep habarlaıdy Kazinform menshikti tilshisi. 

Dúısenbide Mysyrda parlamenttiń tómengi palatasy – Ókilder palatasyna saılaýdyń ekinshi kezeńi bastaldy.

Ulttyq saılaý komıssııasynyń málimetinshe, saılaýdyń ekinshi kezeńi 24-25 qarasha kúnderi Mysyrdyń 27 provıntsııasynyń 13-inde: Kaır, Kalıýbııa, Dakahlııa, Menýfııa, Garbııa, Kafr-el-Sheıh, Sharkııa, Damıetta, Port-Saıd, Ismaılııa, Sýets, Soltústik Sınaı jáne Ońtústik Sınaıda ótedi. 

Bul kezeńde 34,6 mln mysyrlyq daýys berýge quqyly ekeni habarlandy. Olardyń qatysýyn uıymdastyrý úshin 73 saılaý okrýgi jáne 5287 kishi komıtet quryldy.

Saılaýǵa majorıtarlyq júıe boıynsha 1316 kandıdat jáne proportsıonaldy saılaý okrýgterinde usynylǵan bir partııalyq tizim qatysady. Tómengi palatada barlyǵy 568 oryn bar, onyń jartysy táýelsiz kandıdattar arasynda, al ekinshi jartysy saıası partııalar arasynda úlestiriledi. Quramnyń taǵy 5 paıyzyn, ıaǵnı 28 depýtatty prezıdent taǵaıyndaıdy.

Prezıdent Ábdel Fattah as-Sısı dúısenbi kúni Kaırdiń shyǵysyndaǵy Gelıopolıstegi saılaý ýchaskesinde daýys berdi. 

Mysyrdyń Ulttyq saılaý komıssııasy protsess ashyqtyǵyn qamtamasyz etý jáne saılaýshylar erkiniń dál kórsetý mindettemesin atap ótti.

Birinshi kezeń qalaı aıaqtaldy? 

10-11 qarashada ótken daýys berýdiń birinshi kezeńiniń qorytyndysy boıynsha Mysyr Ulttyq saılaý komıssııasy 70 jeke kandıdattyń 42-siniń jeńisin rastady. 

Osy arada komıssııa birinshi kezeńde tirkelgen zańsyzdyqtarǵa baılanysty 19 saılaý okrýgindegi birinshi týrdyń qorytyndylaryn jaramsyz dep taný týraly sheshim qabyldady. Jeti gýbernatorlyqtaǵy 19 saılaý okrýgin qamtıtyn birinshi týrdyń qaıtalanýy 3-4 jeltoqsanǵa belgilengen. 

Birinshi kezeńniń keıbir qorytyndylaryn joıý týraly sheshim as-Sısı 2014 jyly bılikke kelgennen beri osyndaı alǵashqy jaǵdaı boldy. Bul sheshim Gıza men Aleksandrııany qosa alǵanda, 14 gýbernatorlyqtaǵy zańsyzdyqtar týraly habarlamalardan keıin qabyldandy. 
Ábdel-Fattah as-Sısı bılik organdaryna ásirese shıelenisti saılaý okrýgterinde oqıǵalar týraly habarlamalardy qarastyrǵan kezde asa saq bolýdy tapsyryp, «saılaýshylardyń shynaıy erkin» kórsetetin sheshimder qabyldaý qajettiligin atap ótti.

Jergilikti BAQ habarlaýynsha, birqatar saılaýshylar bul qaıta qaraýdy quptap, ony «daýys berýdiń qundylyǵyn» rastaý jáne bolashaq parlamenttiń zańdylyǵyn qamtamasyz etý qajettiligi dep atady. 

Qazirgi parlamenttik naýqan tamyz aıynda ótken parlamenttiń joǵarǵy palatasy – Senatqa saılaýdan keıin úsh aıdan keıin ótip jatyr. 

Eki palata – tómengi palata da, Senat ta bes jyldyq merzimge saılanady.

Buǵan deıin Mysyrda 10-11 qarashada parlamenttik saılaýdyń alǵashqy kezeńi bastalǵanyn jazǵan bolatynbyz.