Mysyrda mert bolǵan qazaqstandyq áıeldiń jaqyndaryna ótemaqy tólenedi

ASTANA. KAZINFORM – Marqumnyń múrdesi elimizge búgin jetkiziledi. Bul týraly Syrtqy ister mınıstriniń orynbasary Álibek Qýantyrov málim etti.

- Marqumnyń máıitin búgin barlyq rásimnen keıin jiberý josparlanyp otyr. Meniń bilýimshe, shyǵyn Mysyr tarapy esebinen júzege asyrylady. Moraldyq ótemaqy máselesi de sheshilgen. Sonymen qatar, sol saparǵa jaýapty qazaqstandyq saqtandyrý kompanııasy da iske qosyldy, - dedi Álibek Qýantyrov Májilis qabyrǵasynda BAQ ókilderiniń saýalyna jaýap bere turyp. 

Onyń aıtýynsha, oqys oqıǵadan zardap shekken eki qazaqstandyq azamat búginde elge oraldy.

- Mysyrdyń azamattyq avıatsııa mınıstri bul máseleni jeke baqylaýynda ustap otyr, sol kúni-aq arnaıy komıssııa jiberildi, bizdiń konsýldyq tarapynan da kómek kórsetilip jatyr, másele únemi nazarymyzda, – dep qosty A. Qýantyrov.

Buǵan deıin Mysyrda mert bolǵan Qazaqstan azamatynyń múrdesi elge jetkiziletini týraly habarlaǵan edik. 

18 mamyrda Sharm-esh-Sheıh áýejaıynda reısti kútip turǵan jolaýshylar turǵan aýmaqta jarnama taqtasy qulady. Oqıǵanyń saldarynan qazaqstandyq áıel mert boldy, taǵy eki otandasymyz jaraqat aldy. 

Oqıǵa týraly aqparat birden prokýratýra organdaryna joldandy. Resmı túrde qylmystyq tergeý bastaldy. Áýejaı ákimshiligi men jarnama agenttiginiń ókilderi jan-jaqty jáne ashyq tergeý júrýi úshin quqyq qorǵaý organdarymen yntymaqtasa iske atsalysyp jatyr.

Al keshe Aqmaral Muqanovanyń jan qurbysy Venera Iskakova marqumnyń múrdesin elge, Aqtóbe qalasyna jetkizý úshin kómek suraǵan edi.