Mysyrda II Týtmostyń qabiri anyqtaldy

ASTANA. KAZINFORM — Bul 1922 jyly Týtanhamonnyń qabiri anyqtalǵaly tabylǵan alǵashqy mysyrlyq patsha qabiri, dep habarlaıdy CBS News. 

Mysyr bıligi seısenbi kúni b. z. d. shamamen 1550-1292 jyldary bılik etken Ejelgi Mysyrdyń XVIII áýleti bıleýshileriniń joǵalǵan beıitteriniń sońǵysy — perǵaýyn II Týtmostyń qabiri anyqtalǵanyn jarııalady.

II Týtmostyń qabirin mysyrlyq-brıtandyq birlesken arheologııalyq mıssııa anyqtaǵan.

Zertteýshiler toby men Mysyrdyń Týrızm jáne kóne jádigerler mınıstrliginiń málimetinshe, buryn tek № C4 degen atpen belgili bolǵan qabir qazbalary onyń II Týtmosqa tıesili ekenin kóz jetkizetin dálelder tapty.

Ǵımaratqa kireberis pen negizgi jol 2022 jyly anyqtalǵan, sodan keıin ishki qazbalar júrgizilgen. 

Mysyrdyń Kónelikter jónindegi Joǵarǵy keńesiniń bas hatshysy Muhammed Ismaıl Haledtiń baıandaýynsha, mıssııa úsh jyl buryn kireberisti alǵashynda tapqan kezde, zertteýshiler ony patsha áıelderiniń birine tıesili bolýy múmkin dep boljaǵan.

Qazbalar men artefaktilerdi zertteý jumystaryn jalǵastyrý kezinde mıssııa jumbaq qabirdiń ІІ Týtmosqa tıesili ekenin kórsetetin jańa dálelder tapty. Sondaı-aq onyń jerleý rásimin áıeli men ápkesi Hatshepsýt ótkizgen dep shamalanyp otyr.

Haledtiń aıtýynsha, qırandylardan tabylǵan alebastr ydystarynyń bólikterinde korol II Týtmostyń, sondaı-aq Hatshepsýttyń esimi jazylǵan jazýlar bar.

Haled bul jańalyqty sońǵy jyldardaǵy eń mańyzdy arheologııalyq oqıǵalardyń biri dep atady. Tabylǵan jádigerler bul aımaqtyń tarıhy men ІІ Týtmos patshalyǵy týraly bilimge qundy qosymsha boldy.

Buǵan deıin habarlanǵandaı, Arab elderi lıgasynyń Palestına jónindegi sammıti Mysyrda ótedi.