Mysyrda faraonǵa tıesili 3000 jyldyq bilezik urlanyp, quıma altynǵa aınalǵan

KAIR. KAZINFORM — 3000 jyl buryn jasalǵan altyn bilezik Mysyrdaǵy mýzeıde qoldy bolyp, keıin quıma altynǵa aınaldyrylǵan, dep jazdy Azertadj.

Mysyrdyń Týrızm jáne ejelgi muralar mınıstrliginiń málimetinshe, bul qundy jádiger qyrkúıektiń 9-y kúni Kaırdegi Egıpet mýzeıinen restavrator mamannyń kómegimen urlanǵan.

AZERTADJ-tyń sheteldik aqparat kózderine silteme jasap habarlaýynsha, restavrator kúmis buıymdarmen aınalysatyn saýdagermen baılanysqan. Ol óz kezeginde bilezikti bir zergerge 3735 dollarǵa satyp jiberedi. Al zerger bilezikti lıteıka (balqytý) zaýytynyń qyzmetkerine 4025 dollarǵa satyp, bilezik basqa buıymdarmen birge balqytylyp jiberiledi.

Mınıstrlik bul iske qatysy bar tórt adamnyń tutqyndalyp, kinálaryn moıyndaǵanyn habarlady.

Bul bilezik Ejelgi Mysyrdy b.z.d. 1001–992 jyldary basqarǵan faraon Amenemopqa tıesili bolǵan. Ol Úshinshi ótpeli kezeń patshalarynyń biri retinde belgili.

Amenemop óz zamanynda qalyń altyn japyraqtardan soǵylǵan keremet jerleý betperdesimen tanymal. Bul betperde patshanyń beınesin tynysh ári máńgilik nurmen jarqyratyp kórsetý maqsatynda jasalǵan delinedi.

Eske sala keteıik, buǵan deıin Túrkııa turǵyndary úshin Mysyr tartymdy týrıstik baǵytqa aınalyp otyrǵanyn jazǵan edik.