Mysyrda ejelgi kopt monastyrynyń bólmeleri tabyldy
ASTANA. KAZINFORM – Mysyrdyń soltústigindegi Beheıra provıntsııasyndaǵy ál-Kalaııa arheologııalyq nysanynda jergilikti arheologtar ǵalymdardyń boljamynsha bizdiń dáýirimizdiń V ǵasyryna jatatyn kopt monastyr kesheniniń bólmelerin tapty. Bul týraly Daily News Egypt basylymy habarlady.
Tabylǵan ǵımarat 13 bólmeden turady. Olardyń qatarynda monahtardyyń jeke bólmeleri, ortaq turǵyn aımaqtar jáne oqý bólmeleri bar. Ǵımarattyń soltústik bóliginde tastan ásemdelgen oryndyqtary bar keń zal ornalasqan. Zertteýshilerdiń pikirinshe, bul oryn qonaqtardy qabyldaý úshin paıdalanylǵan bolýy múmkin. Ǵımarattyń ortasynda arnaıy qulshylyq etýge arnalǵan aımaq anyqtalǵan, munda qabyrǵada áktas materıalynan jasalǵan krest saqtalǵan.
Mysyrdyń Joǵary kóne jádigerler keńesiniń bas hatshysy doktor Hısham El-Leıtı bul olja ejelgi monastyr sáýleti men sol kezeńdegi turmys-tirshilik týraly mańyzdy málimetter beretinin atap ótti.
Arheologtar sonymen qatar ejelgi kopt beıneleý óneriniń izderin de anyqtady. Atap aıtqanda, monahtardyń beınesi salynǵan qabyrǵa sýretteri jáne ósimdik órnekterimen kómkerilgen eki qaraquıryq beınelengen freska tabylǵan.
Ekspedıtsııa jetekshisi Samır Rızk Abdel Hafezdiń aıtýynsha, qazba jumystary barysynda bıiktigi eki metrlik mármár baǵana, baǵanalardyń kapıtelderi men tuǵyrlary, qysh ydystar jáne kóptegen ostrakondar tabylǵan. Ostrakondar — ejelgi dáýirde jazýǵa paıdalanylǵan keramıka synyqtary. Olardyń keıbirine kopt áripteri jazylsa, keıbiri geometrııalyq jáne gúldi órnektermen bezendirilgen.
Eń nazar aýdararlyq oljalardyń biri — kopt jazýy qashalǵan tikburyshty áktas taqta. Ǵalymdardyń paıymynsha, bul jerleý stelasy bolýy múmkin.
Qazba ornynan sondaı-aq janýarlar men qustardyń súıekteri, teńiz qabyrshaqtarynyń synyqtary tabyldy. Bul monahtardyń tamaqtaný ratsıony týraly málimet beredi.
Ál-Kalaııa ejelgi monastyr kesheni hrıstıan monastyr tarıhyndaǵy kólemi jaǵynan ekinshi iri keshen sanalady. Bul aýmaqta qazba jumystary 2023 jyldan beri júrgizilip keledi.
Aıta keteıik, naýryz aıynyń basynda arheologter Mysyrda Ejelgi patshalyq dáýirine tıesili qabirlerdi tapty.