Mysyrda akýla kóbeıdi: bılik týrıstik aımaqtarda teńiz jyrtqyshyn aýlaýǵa kiristi
ASTANA. KAZINFORM – Mysyrdaǵy tanymal kýrorttar jaǵalaýynda akýlalar sany kúrt artty. BAQ málimetinshe, teńiz jyrtqyshtary kýrort maýsymynyń bastalýymen Hýrgada men Sharm-esh-Sheıhtegi týrıstik aımaqtarǵa jıi jaqyndaı bastaǵan. Bul týraly BELTA jazdy.
Mysyrda týrıstik aımaqtarda akýlalardy aýlaý bastaldy. Hýrgada men Sharm-el-Sheıh jaǵalaýynda taıaz sýdaǵy balyq úıirlerine baılanysty akýlalar jıi kórine bastaǵan. Bılik ár qonaqúı shtatynda mindetti túrde bilikti qutqarýshy bolýyn talap etti.
Jaǵalaý boıynda motorly qaıyqtardyń kezekshiligi uıymdastyryldy. Qyzmetkerlerden alǵashqy medıtsınalyq kómek kórsetý daǵdylary talap etiledi.
Jýyrda bir jyrtqysh akýla El-Kýseır týrıstik aımaǵyna kirip ketken. Jergilikti bılik eki metrlik akýlany ustap, kózin joıý úshin jaǵajaılardy ýaqytsha japty.
Bılik muny sol aýmaqta buǵan deıin jolbarys akýlasy bir kún boıy júzip, akvatorııadan ózdiginen ketpegenimen túsindirdi.
Mundaı sharalar týrısterdiń narazylyǵyn týdyrdy. Buryn jyrtqyshtardy ustap, jaǵalaýdan alysqa jiberip otyrǵan.
Eske sala ketsek, bıyl qańtarda Brazılııada 13 jastaǵy bala akýla shabýylynan qaza tapty.
Al Aýstralııa jaǵajaılary akýla shabýyldaryna baılanysty jabyldy.
