Mysyrda 3600 jyl buryn bılik qurǵan patshanyń qabiri tabyldy
ASTANA. KAZINFORM — Fıladelfııadaǵy Pensılvanııa ýnıversıtetiniń Egıpet-Amerıka arheologııalyq mıssııasy Egıpettiń ońtústigindegi Abıdos aımaǵynda 3600 jyl buryn bılik qurǵan belgisiz patshanyń qabirin tapty. Bul týraly Artnet habarlady.
Qabirdiń tereńdigi jeti metrdeı jáne saz kirpishten salynǵan kúmbezdi áktas jerleý bólmesi bar. Kireberistiń eki jaǵynda egıpettik Isıda Neftıda qudaılarynyń esimderi saqtalǵan. Olar jıi birge beınelengen, óıtkeni Isıda týýdy, al Neftıda ólimdi beınelegen.
Zertteýshilerdiń aıtýynsha, Abıdos áýleti bizdiń dáýirimizge deıingi 1630-1539 jyldar aralyǵynda ómir súrgen. Ol kezde Egıpettiń soltústik bóligin gıksolar, ońtústik bóligin birneshe jergilikti patshalar bıledi.
Qabirden tabylǵan patshanyń aty-jóni belgisiz. Arheologtar onyń esimi kireberistegi kirpishterge jazylǵan dep esepteıdi, biraq ıeroglıfter oqylmaıdy, óıtkeni olardy qabir tonaýshylar búldirgen.
Mysyrdyń Ejelgi eskertkishter joǵarǵy keńesiniń bas hatshysy Mohamed Ismaıl Haledtiń aıtýynsha, bul jańalyq Anýbıs taýyndaǵy kóne zırattardaǵy patsha qabirleriniń damýy týraly jańa ǵylymı dálelder usynady. Sondaı-aq Abıdos áýletiniń eń az zerttelgen bıleýshileri týraly qosymsha málimetter beredi.
Kezinde arheologtar bul áýlettiń bar ekenine de kúmán keltirgen. Alaıda Abıdos bıleýshileriniń biri Senebkaıdyń beıiti tabylǵannan keıin jaǵdaı ózgerdi.
Arheologtar aımaqty zertteýdi jalǵastyryp jatyr. Olar bul jerden sol dáýirge jatatyn basqa patshalardyń beıitterin taýyp, sol arqyly jańadan tabylǵan beıit ıesiniń kim ekenin anyqtaýǵa bolady dep boljaıdy.
Eske sala keteıik, Mysyrda II Týtmostyń qabiri anyqtaldy.