Mysyrda 2500 jyl burynǵy ǵıbadathananyń qaldyqtary tabyldy
ASTANA. KAZINFORM — Arheologtar Mysyrdyń batysyndaǵy Baharııa oazısinde shamamen 2500 jyl burynǵy ejelgi hramdar kesheniniń qaldyqtaryn tapty, dep habarlaıdy Sınhýa.
Bul jańalyq Ál-Qasr ál-Qadım («Eski saraı») ǵıbadathanasynyń ornynda tabyldy. Ol bizdiń dáýirimizge deıingi 664-525 jyldar aralyǵynda bılik etken 26-shy áýletke tıesili.
Mysyrdyń Týrızm jáne kóne jádigerler mınıstrliginiń habarlaýynsha, ejelgi eskertkishter joǵary keńesiniń ekspedıtsııasy qumtas qurylymynyń qaldyqtaryn, perǵaýyn Psamtık I-diń esimderi men tıtýldary jazylǵan tas bloktardy jáne basqa da birqatar jádigerlerdi tapqan.
Ejelgi eskertkishter joǵary keńesiniń bas hatshysy Hısham Elleısıdiń aıtýynsha, jańa oljalar ár ýaqytta óńirdiń ákimshilik ortalyqtarynyń biri bolǵan keshenniń mańyzdy tarıhı jáne dinı mańyzyn rastaıdy.
Mysyr kóne jádigerler sektorynyń basshysy Muhammed Abd ál-Badı arheologtardyń 16 qumtas baǵanasy bar ǵıbadathananyń negizgi baǵanaly zalyn, sondaı-aq irgeles bólmeleri men hramdaryn tapqanyn habarlady. Qabyrǵalar men arhıtektýralyq elementterde ejelgi Egıpet qudaılarynyń Amýn-Ra, Amýnet, Honsý esimderi jazylǵan ıeroglıftik jazýlar saqtalǵan.
Zertteýshiler zaldyń qurylysy perǵaýyn Psamtık I tusynda bastalyp, Aprıı degen atpen belgili Ýahıbre men grekterge Amasıs degen atpen belgili ıAhmos II tusynda aıaqtalǵanyn anyqtady.
Ekspedıtsııa sonymen qatar 18-shi áýlettiń perǵaýyn II Amenhoteptiń tusyna jatatyn tas stelany tapty. Bul olja oazıstiń jańa patshalyq kezindegi Mysyr memleketimen baılanysyn rastaıdy. Ramses II kezinde tabylǵan artefaktiler bul jerde 26-shy áýletke deıin de dinı jáne qalalyq belsendilikti dáleldeıdi.
Aıta keteıik, Qytaı men Ózbekstan arheologteri Kýva qalashyǵy qabyrǵalarynyń qaldyqtaryn tapty.
