Mysyr jańartylatyn energııaǵa mıllıardtaǵan dollar ınvestıtsııa salyp jatyr

ASTANA. KAZINFORM — Mysyr jańartylatyn energetıkany damytý boıynsha jalpy somasy 1,8 mlrd dollardy quraıtyn kelisimderge qol qoıdy, dep habarlaıdy AZERTADJ.

Reuters agenttigine silteme jasaǵan agenttik málimetinshe, kelisimder norvegııalyq Scatec kompanııasymen jáne qytaılyq Sungrow kompanııasymen jasalǵan. Scatec — jańartylatyn energııa kózderin damytýǵa mamandanǵan kompanııa.

Mysyr bıligi 2030 jylǵa qaraı eldegi elektr energııasy óndirisiniń 42 paıyzyn jańartylatyn energııa kózderi esebinen qamtamasyz etýdi kózdep otyr. Alaıda resmı tulǵalardyń aıtýynsha, halyqaralyq qoldaý kúsheımese, bul maqsatqa jetý qıynǵa soǵýy múmkin.

Alǵashqy joba aıasynda Scatec kompanııasy Joǵarǵy Mysyrdaǵy Mınıa qalasynda kún elektr stantsııasyn jáne energııa saqtaý stantsııalaryn salady. Jobanyń elektr óndirý qýaty 1,7 GVt, al akkýmýlıatorlyq energııa saqtaý júıeleriniń jalpy syıymdylyǵy 4 GVt⋅saǵ bolady.

Ekinshi joba — Sungrow kompanııasynyń Sýets kanalynyń ekonomıkalyq aımaǵynda akkýmýlıator batareıalaryn óndiretin zaýyt salýy. Úkimettiń habarlaýynsha, zaýytta shyǵarylatyn ónimniń bir bóligi alǵashqy jobaǵa paıdalanylady.

Sonymen qatar kelisimder aıasynda elektr energııasyn satyp alý týraly sharttar da bar. Atap aıtqanda, Scatec kompanııasy 1,95 GVt elektr qýaty men 3,9 GVt⋅saǵ akkýmýlıatorlyq energııa saqtaý júıelerin qamtıtyn kelisimge qol qoıǵan.

Budan buryn Izraıl Mysyrmen quny 35 mıllıard dollar turatyn gaz kelisimin jasasqanyn jazǵanbyz.