Mysyr vıza baǵasynyń ósýi týraly qaýesetterdi joqqa shyǵardy

ASTANA. KAZINFORM — BAQ-ta taraǵan Mysyr vızasynyń quny 25 dollardan 45 dollarǵa deıin ósedi degen aqparat jalǵan. Bul týraly Mysyrdyń Týrızm jáne eskertkishter mınıstrligi habarlady.

Vedomstvo málimetinshe, elge kirý vızasynyń aqysyn kóterý týraly taratylyp jatqan aqparat múldem shyndyqqa janaspaıdy jáne bul másele boıynsha eshqandaı atqarýshy sheshimder qabyldanǵan joq. 

— Qazirgi kezde vızalyq alymdy kóterý týraly emes, eń joǵary aqyny belgileý týraly sheshim qabyldandy, — delingen málimdemede.

Mınıstrlik vızalarǵa nemese basqa da máselelerge qatysty kez kelgen aqparat tek tıisti memlekettik organdardyń resmı málimdemeleri arqyly jarııalanatynyn atap ótti. Osyǵan baılanysty vedomstvo barlyq BAQ jáne áleýmettik jeli paıdalanýshylaryn osy másele boıynsha kez kelgen aqparatty taratpas buryn resmı derekkózderge júginýge shaqyrady.

Buǵan deıin QR Syrtqy ister mınıstrliginiń resmı ókili Aıbek Smadııarov Eýropaǵa vıza rejımin jeńildetý boıynsha kelissózdiń alǵashqy raýndty qalaı ótkenin aıtyp bergenin jazǵan bolatynbyz. 

Qazaqstandyqtar qaı elderge vızasyz bara alatynyn myna materıaldan oqı alasyz. 

Sondaı-aq QR Syrtqy ister mınıstrligi Qazaqstan azamattarynyń Mysyr, Latvııa, Meksıka jáne Reseıge kirýiniń jańartylǵan shartyn jarııalaǵanyn jazdyq.