Mysyr Tramptyń Gaza jónindegi josparyn qabyldaý úshin HAMAS-pen kelissóz júrgizip jatyr

ASTANA. KAZINFORM — Gaza sektorynda soǵysty toqtatý jónindegi dıplomatııalyq belsendilik kúsheıip keledi, dep habarlaıdy Kazinform menshikti tilshisi. 

Mysyr Syrtqy ister mınıstri Badr Abdelattı beısenbi kúni Parıjde sóılegen sózinde Kaır Qatar jáne Túrkııamen birge HAMAS-ty AQSh prezıdenti Donald Tramptyń eki jylǵa jýyq ýaqytqa sozylǵan qaqtyǵysty toqtatýǵa baǵyttalǵan josparyn qabyldaýǵa kóndirýge tyrysyp jatqanyn málimdedi.

Ol Palestına qozǵalysynyń Izraıldiń shabýylyn jalǵastyrýyna jol bermeý úshin qarýsyzdanýy kerektigin basa aıtty.

— Kúndelikti beıbit adamdardy óltirý úshin HAMAS-ty syltaý retinde qoldanýǵa eshkimniń quqyǵy joq, — dep atap ótti mınıstr.

Ol bul jaǵdaılar 2023 jylǵy 7 qazan oqıǵalarynan áldeqaıda asyp túsetinin qosyp ótti.

Palestına densaýlyq saqtaý organdarynyń málimetinshe, Izraıl operatsııasy saldarynan anklavtyń 66 myńnan astam turǵyny qaza tapqan. 

Aq úı osy aptanyń basynda atysty tez arada toqtatý, HAMAS ustaǵan tutqyndardy Izraıldegi palestınalyq tutqyndarǵa aıyrbastaý, Gaza sektorynan ızraıldik áskerlerdi kezeń-kezeńmen shyǵarý, qozǵalysty qarýsyzdandyrý jáne halyqaralyq jetekshilik etetin ótpeli úkimetti qurýdy talap etetin 20 tarmaqtan turatyn qujatty usyndy. Tramp HAMAS-qa jaýap berý úshin úsh-tórt kún ýaqyt berdi.

Mysyr SІM basshysy bul jospardy qoldaıtynyn rastady, biraq ony túzeý qajettigin atap ótti. 

— Ásirese basqarý men qaýipsizdik salasynda tolyqtyrýdy qajet etetin olqylyqtar kóp, — dedi ol.

Onyń aıtýynsha, Kaır kelisim oryndalǵan kezde palestınalyqtardyń kúshtep kóshirilýine jol bermeıdi.

— Kóshirý bolmaıdy, óıtkeni bul Palestına isiniń aıaqtalýyn bildiredi. Biz buǵan eshbir jaǵdaıda jol bermeımiz, — dep qosty Abdelattı.

Óz kezeginde HAMAS saıası bıýrosynyń múshesi Muhammed Nazzal 2 qazanda Al Jazeera telearnasyna qozǵalystyń usynystardy talqylap, óz ustanymyn jaqyn arada jarııalaıtynyn habarlady.

— Biz qujatty Palestına halqynyń múddeleri turǵysynan qarastyryp jatyrmyz, — dedi ol.

AQSh pen olardyń odaqtastary HAMAS-tan oń jaýap kútedi, alaıda óńirde skeptıtsızm saqtalyp otyr. Eýroodaq pen Reseı jospardyń qabyldanýyn jaqtasa, Frantsııa SІM basshysy Jan-Noel Barro HAMAS-tyń jeńilgenin moıyndaýy kerek ekenin málimdedi.

Sarapshylar sondaı-aq bul bastamaǵa Ulybrıtanııanyń burynǵy premer-mınıstri Tonı Bler sııaqty qaıratkerlerdiń qatysýy arab áleminde senimsizdik týdyryp, Irakqa syrtqy aralasýdyń sátsiz áreketterin eske túsiretinin eskertip otyr. 

Buǵan deıin Izraıl áskerı-teńiz flotynyń kemeleri Gaza sektory úshin gýmanıtarlyq júk tıelgen Flotılııany toqtatqanyn jazǵan bolatynbyz. 

Izraıl Syrtqy ister mınıstrligi beısenbi kúni «Global Sumud flotılııasynyń arandatýy aıaqtalǵanyn» habarlady.