Mysyr Tramptyń Gaza turǵyndaryn kóshirmeý týraly sheshimin jaqtady
ASTANA.KAZINFORM - Buǵan deıin AQSh prezıdenti Palestına anklavy turǵyndaryn onyń shekarasynan tys jerlerge kóshirý múmkindigin qarastyrǵan bolatyn.
Beısenbi kúni Kaır AQSh prezıdenti Donald Tramptyń gazalyqtardyń anklavtan ketýin talap etpeıtini týraly sózin joǵary baǵalaıtynyn málimdedi. Bul týraly Mysyr Syrtqy ister mınıstrliginiń málimdemesinde aıtylǵan.
Tramp sársenbi kúni Irlandııanyń premer-mınıstri Maıkl Martınmen Aq úıde kezdesýde suraqqa jaýap berip: «Eshkim palestınalyqtardy Gazadan qýyp jatqan joq», - dedi.
HAMAS ókili Hazem Kasem de Tramptyń sózin quptap, ony «ońshyl sıonısterdiń» kózqarasyna qosylýdan bas tartýǵa shaqyrdy.
- Eger Tramp málimdemesi Gaza sektorynyń turǵyndaryn kóshirý týraly kez kelgen ıdeıadan bas tartýdy bildirse, onda oǵy quptaýǵa bolady, - dedi Kasem.
Aqpan aıynda Tramp AQSh-qa Gaza sektoryn baqylaýǵa alýdy, palestınalyqtardy birjola qýyp shyǵýdy jáne anklavty «Taıaý Shyǵystaǵy Rıveraǵa» aınaldyrýdy usyndy. Qonys aýdarý oryndary retinde Iordanııa men Egıpet usynyldy. Buqaralyq aqparat quraldarynyń habarlaýynsha, búginge deıin Tramp sektor turǵyndaryn qonystandyrý múmkindigin joqqa shyǵarmaǵan.
Sonymen qatar sársenbi kúni Katar astanasynda kelissózder ótip, onda arab elderiniń syrtqy ister mınıstrleri AQSh-tyń Taıaý Shyǵystaǵy arnaıy ókili Stıven Ýıtkoffpen Egıpettiń Gaza sektoryn soǵystan keıingi basqarý josparyna qatysty konsýltatsııalardy jalǵastyrýǵa kelisti.
Saýd Arabııasy, Birikken Arab Ámirlikteri, Qatar, Mysyr jáne Iordanııanyń syrtqy ister mınıstrlerimen kelissózge Palestına prezıdentiniń bas kómekshisi Hýseın ál-Sheıh te qosyldy.
Dohadaǵy kelissózderden keıin Ýıtkoff Reseıge bet aldy. Máskeý Djıddadaǵy ýkraın-amerıka kezdesýlerinen keıin Ýkraına boıynsha kelissózderge daıyn ekenin bildirdi.
Aıta keteıik, Arab sammıti Mysyrdyń Gaza sektory boıynsha josparyn qoldady.