Mysyr Somalıdiń aýmaqtyq tutastyǵyn qoldaıtynyn málimdedi
ASTANA. KAZINFORM – Mysyr Somalıdiń birligi men aýmaqtyq tutastyǵyna nuqsan keltirýi múmkin kez kelgen áreketti, sonyń ishinde Somalılendti tanýdy qabyldamaıtynyn taǵy da málimdedi, dep habarlaıdy Anadolý.
Mysyr Syrtqy ister mınıstrliginiń málimetinshe, eldiń syrtqy ister mınıstri Badr Abdelatı Somalıdiń syrtqy ister mınıstri Abdýssalam Abdı Alımen telefon arqyly sóılesti.
Taraptar ekijaqty yntymaqtastyqty damytý, Somalıdegi ishki jaǵdaı jáne Afrıka múıisi aımaǵyndaǵy ahýaldy talqylady. Badr Abdelatı Mysyrdyń Somalıdiń birligine, egemendigine jáne aýmaqtyq tutastyǵyna qoldaýy ózgermeıtinin atap ótti.
– Biz Somalıdiń aýmaqtyq tutastyǵyna nuqsan keltirýi múmkin kez kelgen bastama men áreketti qabyldamaımyz, – dedi ol.
Mınıstrdiń aıtýynsha, osy turǵydan alǵanda, «Somalılend» dep atalatyn óńirdi táýelsiz memleket retinde taný da Somalıdiń birligi men egemendigin buzý bolyp sanalady.
Óz kezeginde Somalıdiń syrtqy ister mınıstri Abdýssalam Abdı Alı Kaırdiń eline saıası, damý jáne qaýipsizdik salalarynda turaqty qoldaý kórsetip kele jatqany úshin alǵys bildirdi.
Ol Mysyrdyń Somalıdiń birligine, egemendigine jáne aýmaqtyq tutastyǵyna bildirip otyrǵan qoldaýyn joǵary baǵalaıtynyn aıtty.
Sondaı-aq mınıstr ekijaqty jáne óńirlik máseleler boıynsha Mysyrmen úılestirý men konsýltatsııalardy jalǵastyrýǵa daıyn ekenin jetkizdi.
Somalılend 1991 jyly Somalıden birjaqty túrde táýelsizdigin jarııalaǵanymen, búginge deıin halyqaralyq qaýymdastyq ony táýelsiz memleket retinde moıyndaǵan joq.
Al Somalı Somalılendti óz aýmaǵynyń ajyramas bóligi dep sanaıdy jáne bul óńirge qatysty halyqaralyq kelisimder jasaý quqyǵy tek Mogadıshodaǵy ortalyq úkimetke tıesili ekenin málimdep keledi.
Eske sala ketsek, byltyr jeltoqsanda Izraıldiń Somalılendti táýelsiz memleket retinde tanýy ne úshin daý týdyrǵanyn jazdyq.
