Mysyr SІM basshysy: Gaza boıynsha kelissózder barysynda aıtarlyqtaı jetistikke qol jetkizildi

ASTANA. KAZINFORM – Gaza sektorynda atysty toqtatý boıynsha Kaırde ótken kelissózder barysynda aıtarlyqtaı jetistikke qol jetkizildi. Mysyr Syrtqy ister mınıstr Badr Abdel óziniń reseılik áriptesi Sergeı Lavrovpen áńgime barysynda osylaı dedi, dep habarlaıdy TASS.

- Kaırde Gaza boıynsha palestınalyq delegatsııa ókilderiniń qatysýymen ótken sońǵy keńes qorytyndysy boıynsha jaqsy nátıjege qol jetkizdik. HAMAS AQSh prezıdentiniń arnaıy elshisi Stıven Ýıtkofftyń bastamasyna negizdelgen usynysyna kelisti, endigi sózdi Izraıl aıtady,- dedi Mysyr syrtqy ister vedomstvosynyń basshysy.

Onyń bul sózin mınıstrliktiń baspasóz qyzmeti taratty.

Abdel Aty deldaldardyń usynysyna kóndirý úshin álemdik qaýymdastyq Izraılge qysym kórsetedi degen úmitte.

Osyǵan deıin HAMAS araǵaıyndyq jasaýshy tarapqa palestınalyq anklavta atysty toqtatý týraly usynysqa kelisimin bergen bolatyn.

Mysyrdyń "Al-Kahıra al-Ihbarııa" telearnasy derekkózderiniń habarlaýynsha, qozǵalys 60 kúndik atysty toqtatý sharasy aıasynda Gaza sektorynda kepildikte otyrǵan adamdardyń jartysyn bosatýǵa kelisken. Ol úshin Izraıl tarapy da birqatar palestınalyq tutqyndardy bosatýy kerek.

Usynysta sonymen qatar anklavqa kedergisiz gýmanıtarlyq kómek jiberý úshin Izraıl áskeriniń sektor shekarasyna sheginýi qarastyrylǵan.

Atysty toqtatý rejımi engizilgennen keıin HAMAS pen Izraıl tatýlasyp, barlyq baǵyt boıynsha kelisimge kelýi kerek.

Osyǵan deıin HAMAS-tyń Mysyrmen Gaza boıynsha kelisimdi talqylaǵany týraly jazdyq.